لہور ہائی کورٹ دا الیکشن کمیشن نوں پنجاب وچ الیکشن دی تریخ دین دا حکم

لہور(پنجابی میڈیاگروپ)لہور ہائیکورٹ نے الیکشن کمیشن نوں پنجاب وچ90دناں اندر الیکشن تریخ دین دا حکم جاری کردتا۔لہور ہائی کورٹ نے پنجاب وچ الیکشن دی تریخ دے حوالے نال دائر درخواست نوں وی منظور کرلیا۔جسٹس جواد حسن نے تحریک انصاف دے جنرل سیکرٹری اسد عمر سنے ہوراں دیاں درخواستاں اُتے سماعت کیتی تے محفوظ فیصلہ سنایا۔ایس توں پہلاں آئی جی پنجاب نے موقف اختیار کیتا سی کہ الیکشن بارے جیہڑا الیکشن کمیشن دا فیصلہ ہوئے گا اسیں اوس اُتے عملدرآمد کراں گے جدکہ چیف سیکرٹری پنجاب نے آگاہ کیتا سی کہ اسیں آئین دے آرٹیکل220 اُتے عملدرآمد دے پابند نیں عدالت تے الیکشن کمیشن جو وی فیصلہ کرے اسیں اوس اُتے عملدرآمد دے پابند ہاں۔الیکشن کمیشن دے وکیل نے الیکشن بروقت کروان توں معذوری ظاہر کردتی۔ الیکشن کمیشن دے وکیل دا موقف سی کہ تریخ دینا الیکشن کمیشن دا کم نہیں اے، عدلیہ،چیف سیکرٹری، فنانس سب نے افسراں تے فنڈ دین توں معذرت کرلئی اے الیکشن کمیشن اینج دے حالات وچ کِنج الیکشن کروا سکدا اے،ساہنوں الیکشن کران لئی14ارب روپے دی لوڑ اے،قنون وچ الیکشن دی تریخ مؤخر ہو سکدی اے۔گورنر دے وکیل شہزاد شوکت نے دلائل وچ آکھیا اگر اسمبلی خودبخود تحلیل ہُندی اے تے گورنر الیکشن دی تریخ دین دا پابند نہیں اے تحریک انصاف دے وکیل دا کہنا سی کہ آئین وچ واضح درج اے کہ اسمبلی تحلیل توں بعد 90دناں وچ الیکشن ہون گے، صدر مملکت وی الیکشن دی تریخ دے سکدے نیں،عدالت حکم دیوے گی تے صدر تریخ دے دین گے۔لہور ہائیکورٹ نے پنجاب وچ الیکشن دی تریخ لئی دائر درخواستاں اُتے وکیلاں دے دلائل مکمل ہون توں بعد محفوظ فیصلہ سُنایا جائے گا