نواز شریف چھیتی ساڈے وچکار ہون گے،مریم نواز
اسلام آباد(پنجابی میڈیاگروپ)پاکستان مسلم لیگ(ن) دی نائب صدروچیف آرگنائزرمریم نواز نے آکھیا اے کہ نواز شریف چھیتی ساڈے وچکار ہون گے،اوہناں اُتے قائم مقدمے وی چھیتی ختم ہُندے وکھائی دین گے، مہنگائی اُتے اکھاں بند نہیں کر سکدے ،شہباز شریف دا فوکس گورننس ٹھیک کرن، ملک و قوم نوں مسائل دی دلدل توں کَڈن اُتے اے،وطن واپسی اُتے میری توقع توں وَدھ رسپانس ملیا،جلسے الیکشن دے نیڑے کراں گے،ساڈا مقابلہ بوہت بدتمیز لوکاں نال اے،سچا الزام دوہراندیاں ہویاں وی ساہنوں بوہت مشکل پیش آندی اے،اپنا آئی ٹی ونگ بنا رہے ہاں،ڈاکٹر افنان اللہ اوس اُتے کم کررہے نیں،شاہد خاقان عباسی میرے بھائی نیں،خود چل کے جاؤاں گی،تنظیم سازی اُتے توجہ مرکوزکیتی ہوئی اے،کوئی کرسی میری ترجیح نہیں، پی ڈی ایم انتخابی اتحاد نہیں،جنید دا اجے سیاست وچ آن دا کوئی ارادہ نہیں۔پاکستان مسلم لیگ (ن) دی سینئر نائب صدر تے چیف آرگنائزر مریم نواز نے میڈیا نال غیررسمی ملاقات وچ گل بات کردیاں ہویاں آکھیا کہ عوام جاندی اے کہ موجودہ مسائل، مہنگائی تے معاشی تباہی پاروں آئی، کون ایس دا ذمہ دار اے ؟ اوہناں نے آکھیاکہ مسلم لیگ (ن) دی بنیاد، شناخت تے اصل قوت کارکردگی اے۔ اوہناںنے آکھیاکہ جب وطن واپسی آئی تے عوام دا جوش خروش تے تعداد ویکھ کے خوشگوار سرپرائز ملیا ،میری توقع توں وَدھ کے رسپانس ملیا۔ اوہناںنے آکھیاکہ بہاولپور، ملتان، ایبٹ آباد وچ پارٹی کارکناں دے جذبیاں اُتے بوہت متاثر ہوئی ہاں ۔مریم نواز نے آکھیا کہ اسلام آباد وچ تنظیمی کنونشن دا جذبہ مثالی تے دیدنی سی،نوجوان،عورتاں تے بزرگاں دی وڈی تعداد وی موجود سی ۔اوہناںنے آکھیاکہ شہباز شریف دا فوکس گورننس ٹھیک کرن،ملک و قوم نوں مسائل دی دلدل توں کڈن اُتے اے۔
