کراچی وچ بلڈنگ ڈگی، لوک مرے، سب سُتے رہے، کسے نوں احساس نہیں: چیف جسٹس

کراچی: چیف جسٹس گلزار احمد نے کراچی تجاوزات کیس وچ ریمارکس دتے کراچی وچ بلڈنگ ڈگی، لوک مرے، سب سُتے رہے، کسے نوں وی احساس نہیں، ریونیو ڈیپارٹمنٹ سنے سب ادارے چور نیں، کراچی نوں مربوط منصوبے دی لوڑ اے۔ سپریم کورٹ کراچی رجسٹری وچ چیف جسٹس دی سربراہی وچ بنچ نے تجاوزارت سنے اہم کیساں سی امعت کیتی۔

اٹارنی جنرل خالد جاوید خان، ایڈووکیٹ جنرل سندھ سلمان طالب الدین تے دوجے عدالت وچ پیش ہوئے۔ جسٹس گلزار احمد نے شدید برہمی دا اظہار کیتا تے آکھیا نکے نکے پلاٹاں تے اُچی عمارتاں بن رہیاں نیں، تسیں بین تے بانسری وجا رہے او، اجے تے مرن دی گنتی شروع ہوئی اے، اگے ویکھو خدانخواستہ پورا کراچی ای نہ ڈگ جاوے۔ جدوں تک اُتوں ڈنڈ نہ ہووے کوئی کم نہیں کردا۔ایڈووکیٹ جنرل بولے اسیں کرپٹ افسراں دے خلاف کاروائی کیتی اے۔ جسٹس سجادعلی شاہ آکھیا ایہ سب وکھاوے لئی کاروائی کیتی۔

ایڈووکیٹ جنرل سندھ نے سرکلر ریلوے بارے سپریم کورٹ دا فیصلہ پڑھ کے سنایا تے دسیا پیشرفت ہوئی اے، کراچی ماس ٹرانزٹ پلان ترتیب دتا اے۔ چیف جسٹس نے ماس ٹرانزٹ دے نقشے تے عدم اعتماد دا اظہار کیتا۔ چیف جسٹس آکھیا دسو گرین لائن کدوں شروع کیتی، حکام نے آکھیا 3ورھے پہلاں شروع کیتی، منصوبہ اگلے ورھے پورا ہو جاوے گا۔

فیصل صدیقی ایڈووکیٹ آکھیا سرکلر ریلوے دی زمین تے غریباں نوں ہٹایا کسے نوں متبادل تھاں نہیں دتی۔ چیف جسٹس نے کمشنر کراچی نوں آکھیا سن لوو بلاامتیاز کاروائی کرو۔ عدالت نے سماعت 26مارچ تک ملتوی کرکے تفصیلی رپورٹ طلب کر لئی۔