اج کرپشن پاروں زندہ رہن دا حق متاثر ہویا اے:چیف جسٹس

اسلام آباد(پنجابی میڈیا)سپریم کورٹ وچ نیب ترمیم کیس دی سماعت ہوئی ، ایس دوران چیف جسٹس نے ریمارکس دیندیاں ہویاں آکھیا کہ قدیم معاشرے وچ زندہ رہن دا حق محض روٹی، کپڑا تے مکان نال پورا ہُندا ہوئے گا ۔ چیف جسٹس نے آکھیا کہ اج دے زمانے وچ زندہ رہن لئی تعلیم تے صحت سنے سہولتاں لازمی نیں،کرپشن پاروں زندہ رہن دا حق متاثر ہویا اے،اج 2اغوا شدہ بچیاں6ورھیاںبعد بازیاب ہویاں کیونکہ کوئی نظام ہی نہیں اے، پلس نوں بچیاں دی بازیابی لئی انٹیلی جنس ایجنسیاں دا سہارا لینا پئیا۔چیف جسٹس نے ریمارکس دیندیاں ہویاں آکھیا پلس وچ صلاحیت دا فقدان اصل وچ شہریاںدے زندہ رہن دے حق دی خلاف ورزی اے، واضح کہہ چکے ہاں کہ عدلیہ حکومت کرنا چاہندی اے نہ ہی کرے گی، کئی سو نیب کیس عدالتاں توںواپس ہو رہے نیں،نیب ترمیم نے زیر التوا کیساں دادروازہ بندکردتا اے،نیب ترمیم نوں8مہینے ہو گئے مگر اوہناں دے باقاعدہ نفاذ یا کیس دی منتقلی داطریقہ کار نہیں بنایا جا سکیا۔ایس دوران جسٹس اعجازالاحسن نے استفسار کیتا کہ حکومت کول اگر نیب قنون وچ الفاظ بدلن دا ویلا اے تے کیس دی منتقلی دا طریقہ کار بنان دا کیوں نہیں؟چیف جسٹس نے آکھیا اگر احتساب عدالت دے منتقل کیساں نوں اینٹی کرپشن دائرہ اختیار توں خارج قراردیوے یے کیہ ہوئے گا؟جواب وچ وکیل مخدوم علی خان نے آکھیا نیب قنون توں پہلاں وی50ورھے ملک وچ کرپشن دے کیس نمٹائے گئے سن، کیس دی ہور سماعت کل تک ملتوی کردتی گئی۔