170ارب دے ٹیکس،رات ورات پٹرول وَدھ، عوام باہر نکلے‘تحریک انصاف

اسلام آباد(پنجابی میڈیا)تحریک انصاف دے رہنما فواد چوہدری نے منی بجٹ تے پیٹرول دی قیمت ودھن اُتے عوام نوں باہر نکلن دا مشورہ دے دتا۔منی بجٹ اُتے رد عمل دیندیاں آکھیا کہ170ارب دے ٹیکس لائے تے رات وچ پیٹرول دی قیمت ودھا کے شب خون ماریا گیا، مڈل تے لوئر مڈل کلاس دے لوگ غربت دی لکیر توں نیچے چلے گئے، جد تک پاکستان دے لوگ نہیں نکلن گے ایہ ظلم ہُندا رہے گا ۔ اوہناں نے آکھیا کہ اسحاق ڈار دے کیہڑے بال پاکستان وچ نیں جس دی اوہ فکر کرے، حکومت دی ساری توجہ ایس اُتے اے کہ کس طرح عمران خان نوں جیل گھلنا اے، عوام اُتے مہنگائی دا بوجھ ودھا دتاگیا، اگر اسیں احتجاج نہیں کردے تے ایس دا مطلب اے کہ جو ہورہیا اے اسیں ایس لائق ہاں، ایہ سب کجھ ہرگز برداشت نہیں کرنا چاہندا ایس دے خلاف نکلنا چاہیدا اے۔