عمران خان داقمر باجوہ ولوں حلف دی خلاف ورزی دی تحقیقات دا مطالبہ
لہور(پنجابی میڈیا)پاکستان تحریک انصاف دے چیئرمین و سابق وزیر اعظم عمران خان نے صدر مملکت عارف علوی نوں ملک دی بری فوج دے سابق سربراہ جنرل (ر) قمر جاوید باجوہ دے خلاف تحقیقات دا مطالبہ کر دتا ۔سابق وزیر اعظم عمران خان نے خط وچ جنرل قمر جاوید باجوہ ولوں حلف دی خلاف ورزیاں دی تفصیل وی گھل دتی ۔عمران خان نے سابق آرمی چیف قمر جاوید باجوہ ولوں بطور آرمی چیف حلف دی خلاف ورزی دی تحقیقات دا مطالبہ کردیاں ہویاں آکھیا اے کہ پچھلے کجھ دناں دے دوران عوامی سطح اُتے نہایت ہوشربا انکشافات ہوئے نیں، منظر عام اُتے آن والی معلومات توں واضح ہُندا اے کہ جنرل باجوہ اپنے حلف دی صریح خلاف ورزی دے مرتکب ہوئے نیں۔عمران خان نے خط وچ آکھیا کہ سابق آرمی چیف نے صحافی و کالم نگار جاوید چوہدری نال ملاقات وچ اعتراف کیتا کہ اسیں عمران خان نوں ملک لئی خطرہ سمجھدے ساں ، جنرل باجوہ نے ایہ وی اعتراف کیتا کہ ساڈے خیال وچ اگر عمران خان اقتدار وچ رہے تے ملک نوں نقصان ہوئے گا،خط وچ چیئرمین پی ٹی آئی دا کہنا سی کہ جنرل باجوہ ولوں’’اسیں‘‘دے لفظ دا استعمال تحقیق طلب اے، تحقیق کیتی جائے۔
