کراچی پورٹ قاسم دے نیڑے کیمیکل فیکٹری توں گیس دا اخراج، 100بندے ہسپتال منتقل
کراچی: پورٹ قاسم وچ کیمیکل فیکٹری دی گیس پائپ لائن لیک کر گئی، زہریلی گیس پھیلن نال 100دے قریب ملازمین دی حالت غیر ہو گئی۔ پورٹ قاسم وچ کیمیکل فیکٹری وچ گیس دے اخراج واقعے دے فوری بعد فیکٹری وچ کم بند کر دتا گیا سی، کیمیکل فیکٹری دی گیس پائپ لائن پھٹن نال زہریلی گیس پھیلن نال متاثر ہون والے ملازمین نوں فوری طور تے شہر دے وکھو وکھ ہسپتال اپڑایا گیا۔
ڈاکٹر سیمی جمالی دے مطابق 47متاثرہ بندیاں نوں دم گھٹن دی شکایت تے جناح ہسپتال لیایا گیا سی جد کہ باقی متاثرہ ملازمین نوں ملیر دے نجی ہسپتال لے جایا گیا پر سارے بندیاں دی حالت خطرے توں باہر اے جہناں نوں طبی امداد دے کے گھر گھل دتا گیا ۔
نجی کمپنی دے ترجمان دا کہنا اے پورٹ قاسم تے ہون والی گیس لیکج تے فوری قابو پا لیا گیا سی، حادثے نال کسے قسم دا کوئی جانی یاں مالی نقصان نہیں ہویا، کمپنی حادثے بارے تفصیلات اکٹھی کر رہی اے، واقعہ دی پوری تحقیقات کیتی جان گیاں۔
