جیل بھرو تحریک دا ایسا جواب دیاں گے جیہڑا وہم وگمان وچ وی نہیں ہوئے گا،رانا ثنا اللہ

پنڈی(پنجابی میڈیاگروپ)پاکستان مسلم لیگ(ن)پنجاب دے صدرتے وزیرداخلہ رانا ثناء اللہ نے آکھیا اے کہ عمرانی ٹولہ پچھلے7مہینیاں توں جدوجہد کر رہیا اے کہ ملک ڈیفالٹ کرے، ساڈی کوشش اے پاکستان اینہاں بحراناں توں نکلے،جَد وی مشکل ویلا آیا مسلم لیگ(ن) تے نوازشریف نے ملک نوں بحراناں توں کَڈیا،جیل بھرو تحریک دا ایسا جواب دیاں گے جیہڑا وہم وگمان وچ وی نہیں ہوئے گا۔مسلم لیگ(ن)دے تنظیمی کنونشن نال خطاب کردیاں ہویاں وزیر داخلہ رانا ثنا اللہ نے آکھیا کہ شیخ رشید کہہ رہیا سی کہ مسلم لیگ (ن)الیکشن توں نٹھ رہی اے، میں کہنداہاں ایہ ویکھو مسلم لیگ(ن)دے ورکراںنال پنڈال بھریا ہویا اے،ایہ سارے الیکشن لڑن لئی تیار نیں تے انشا اللہ ایس وار پنڈی دیاں دونوں سیٹاں توں شیخ رشید تے اوس دا بھتیجا وی ہرے گا۔وزیر داخلہ رانا ثناء اللہ نے آکھیا کہ ساڈی صرف اک رائے اے ملک وچ اک ہی نگران حکومت ہوئے گی تے الیکشن صاف تے شفاف ہون گے، آئین وچ90دناں وچ الیکشن دا ذکر اے لیکن ایتھے ایہ وی اے کہ پاکستان وچ الیکشن کیئرٹیکر سیٹ اپ تحت ہون گے تاکہ الیکشن صاف تے شفاف ہون،اگر2اسمبلیاں دے الیکشن اج تے3اسمبلیاںدے3مہینیاں بعد ہون گے تے سارا سال الیکشن ہُندارہے گا۔