ملک نوں ایمان دار ججاں دی لوڑاے عمران دار ججاں دی نہیں،مریم نواز
پنڈی(پنجابی میڈیاگروپ)مسلم لیگ(ن) دی چیف آرگنائزرمریم نواز نے آکھیا اے کہ ملک نوں ایماندار ججاں دی لوڑ اے عمران دار ججاں دی نہیں،جسٹس مظاہر نقوی وچ اینہی اخلاقی جرآت نہیں کہ استعفیٰ دیون،تریخ وچ اینج دے ججاں دا نام بابا زحمت ونگوں آئے گا،میں عدلیہ دی گل نہیں فیض دے چیلیاں دی گل کررہی ہاں، پہلاں اسٹیبلشمنٹ تے ہُن عدلیہ دے موڈھیاں اُتے چڑھ کے آن دی تیاری اے،دُوجیاں نوں چور کہن والا خود سب توں وڈاچور نکلیا،الیکشن توں نٹھن دا الزام لان والا عمران خان خود چھپ کے بیٹھا اے،مہنگائی تے عمران خان نوں اکٹھے چُک کے باہر سُٹاں گے۔ایہہ گلاں اوہناں نے پنڈی وچ مسلم لیگ (ن) دے تنظیمی کنونشن نال خطاب کردیاں ہویاں کیتیاں۔مریم نواز نے آکھیا کہ پنڈی دی عوام نوں ن لیگ دا سلام،ن لیگ دے کنونشنں وچ عورتاں دی تعداد وَدھ رہی اے۔اوہناں نے آکھیاالیکشن وچ معلوم ہوئے گا کہ مسلم لیگ ن دے کول نوجواناں دی فوج اے، پنڈی دی عوام نوازشریف نال محبت کردی اے،نواز شریف دی محبت پنڈی توں ڈھکی چھپی نہیں، نواز شریف نے پاکستان دی پہلی موٹروے دا آغازپنڈی توں کیتا۔مریم نوازنے آکھیا کہ نواز شریف خدمت وچ مصروف رہیا تے عمران خان گھڑیاں چوری کردارہیا، اک حکمران4ورھے بنی گالہ وچ چھپ کے بیٹھا رہیا، عمران خان نے ریکارڈ قرضے لے کے اک منصوبہ وی پنڈی نوں نہیں دتا، نواز شریف، شہباز شریف نوں تباہ حال پاکستان ملیا، جَد مشکلاں ہُندیاں نیں تے نواز شریف نوں بلا لیندے نیں، مشکلاں کوئی پیدا کردا اے تے ٹھیک نواز شریف کردا اے۔مسلم لیگ (ن) دی رہنما نے ہور آکھیا کہ مہنگائی دا دُوجا نام عمران خان اے، عمران خان دی نااہلی پاروں مہنگائی اے، نواز شریف دور وچ کھان پین دیاں شیواں سستیاں سن،نواز شریف دور وچ روٹی2 توں5 روپے وِکدی سی،مہنگائی تے عمران خان نوں اکٹھے چُک کے باہر سُٹاں گے،عمران خان آئی ایم ایف دی شکل وچ بارودی سرنگاں وچھا کے گیا۔ اوہناں نے آکھیا عمران خان نے نوازشریف دے ترقیاتی منصوبیاں نوں التوا دا شکار کیتا،ایہ ملک لٹ دے تے جیباں بھردے رہے، نواز شریف دے4 تے عمران خان دے4 سالہ دور دا موازانہ کر لو،24 ہزارارب دا قرضہ لین والے نے پنڈی وچ کوئی منصوبہ لایاسیَ؟ اوس نے پنڈی رنگ روڈ وچ مال بنان دا منصوبہ لازمی لایا، القادر منصوبہ وچ غبن کرن والا اپنی ٹرسٹی بن دتا گیا۔مریم نواز نے آکھیا کہ لوگ کہندے نیں کہ میں چیف آرگنائزر بن گئی لیکن ایہ کارکناں نوں مبارک ہوئے ،نواز شریف نوں ہمیشہ تھلے جاندا ہویا پاکستان ملیا اے، نوازشریف مٹی دا پُتر اے اوہ ایتھے واپس آئے گا، اوہناںنے آکھیا کہ کیا عمران خان نوں آئی ایم ایف دے سامنے نہیں لیانا چاہیدا سی؟لیکن اوہ بنکر وچ بیٹھ گیا، شہباز شریف عمران خان دی بچھایاں ہویاں بارودی سرنگاں دور کررہے نیں، ن لیگ ملک نوں ٹھیک نہ کرسکی تے کوئی جماعت نہیں کرسکدی۔مریم نواز نے آکھیا کہ جنرل فیض اسٹیبلشمنٹ دے موڈھے تلاش کررہیا اے، پرویز الہی دی آڈیو سب نے سنی اے، ملک نوں ایمان دار ججاں دی لوڑ اے عمران دار ججاں دی نہیں، نام آئے کنے دن لنگ گئے لیکن جسٹس مظاہر نقوی وچ اینہی اخلاقی جرآت نہیں کہ استعفی دیون، کیا نہیں دینا چاہیدا؟ میں عدلیہ دی گل نہیں فیض دے چیلیاںدی گل کررہی ہاں، تریخ وچ اینج دے ججاں دا نام بابا زحمت ونگوں آئے گا۔اوہناں داکہنا سی کہ ملک نوں بحراناں توں کَڈن والا صرف نواز شریف اے۔
