جیل بھرو تحریک دا مقصد سیاسی عد م استحکام پیدا کرنا اے،رانا ثنااللہ

اسلام آباد( پنجابی میڈیا)پاکستان مسلم لیگ(ن)دے رہنما تے وفاقی وزیر داخلہ رانا ثنا اللہ ہوراں آکھیا اے کہ جیل بھرو تحریک دا اصل مقصد اک ڈرامہ رچانا اے،تحریک دا مقصد میڈیا دی توجہ، امن و امان دی صورتحال نوں متاثر کرنا تے سیاسی عدم استحکام پیدا کرنا اے۔ملک وچ امن وامان دی صورتحال بارے وزیرداخلہ رانا ثنا اللہ دی زیر صدارت اجلاس ہویا جس وچ سیکرٹری داخلہ، پنجاب، سندھ،خیبرپختونخوا تے اسلام آباد دے آئی جیز رَلتی ہوئے،اجلاس وچ ہوم سیکرٹریاں،کمشنر اسلام آباد تے ہور اعلی افسراں نے وی رَلت کیتی۔اجلاس وچ فیصلہ ہویا کہ ملک وچ امن و امان دی صورتحال نوں یقینی بنایا جائے گا، قنون توڑن والیاں نوں گرفتار کیتا جائے گا،امن دشمناں داریکارڈ رکھیا جائے گا تے اوہناں دے کیریکٹر سرٹیفکیٹ وچ واضح کیتا جائے گا۔اجلاس دے رَلتیاں نال گل بات کر دیاں وزیر داخلہ رانا ثنا اللہ نے آکھیا کہ قنون توڑن والیاں دے خلاف شواہد اکٹھے کر کے عوام سامنے لیائے جان، قنون شکناں دااصل چہرہ بے نقاب ہونا چاہیدا اے،عورتاں تے غریب کارکناں دی گرفتاری توں گریز کیتا جائے۔