پرویز الہی اپنے ساتھیاں سنے پی ٹی آئی وچ شامل

لہور( پنجابی میڈیا)سابق وزیر اعلی پنجاب پرویز الہی نے اپنے ساریاں ساتھیاں نال پاکستان تحریک انصاف وچ شامل ہون دا اعلان کردتا۔اوہناں نے آکھیا کہ اسیں عمران خان دے نال ڈٹ کے کھڑے ہاں تے آئندہ وی کھڑے رہواں گے، عمران خان دی قیادت اُتے مکمل اعتماد اے تے اسیں شکر گزار ہاں کہ اوہناں نے ساہنوں موقع وی دتا۔پرویز الہی نے آکھیا کہ ساڈا تے ساتھیاں دا عمران خان نال ساتھ ہمیشہ رہے گا، اسیں ہر اوہ کم کراں گے جس نال ملک تے پنجاب دا فائدہ ہوئے گا، کَدی کوئی اینج دا کم نہیں کراں گے جس نال ساڈی پارٹی پی ٹی آئی نوں نقصان پہنچے۔اک سوال دے جواب وچ پرویز الہی نے آکھیا کہ اگر کوئی سمجھدا اے کہ اشارے دی وجہ نال پی ٹی آئی وچ شمولیت اختیار کیتی تے ایہ چنگی خبر اے، میری کوشش اے کہ سب نوں نال لے کے چلاں۔ اوہناں ہور آکھیا کہ عمران خان نے مرکزی صدر دا عہدہ دین دی گل کیتی اے اوس اُتے چھیتی کم مکمل کرلیا جائے گا۔پی ٹی آئی دے سینئر رہنما فواد چوہدری نے دسیا کہ پرویز الہی نوں پاکستان تحریک انصاف دا صدر بنایا جائے گا جس دی سینئر قیادت نے پارٹی آئین دے مطابق منظوری دے دتی۔ اوہناں نے آکھیا کہ پرویز الہی تے اوہناں دے ساتھی بشمول اراکان ہمیشہ عمران خان دے نال سیسہ پلائی دیوارونگوں کھڑے ہوئے نیں، جس دی اوہناں نوں قیمت وی ادا کرنا پئی۔فواد چوہدری نے پرویز الہی تے اوہناں دے ساتھیاں نوں پارٹی وچ شامل ہون اُتے خوش آمدید کہندیاں ہویاں آکھیا کہ اسیں عمران خان دی قیادت وچ اوس پاکستان ول ودھاں گے تے نوا پاکستان دا خواب پورا کر کے وکھاواں گے۔