وفاقی کابینہ اجلاس:کفایت شعاری پالیسی منظور

اسلام آباد(پنجابی میڈیا)وزیر اعظم شہباز شریف دی زیر صدارت وفاقی کابینہ دااجلاس ہویا، جس وچ وفاقی کابینہ نے کفایت شعاری پالیسی دی منظوری دے دتی، وزیراں نے تنخواہواں تے ساریاں مراعات نہ لین دا فیصلہ کیتا اے۔اجلاس وچ فیصلہ کیتا گیا کہ کابینہ اراکان تے سرکاری افسر سفر لئی بزنس کلاس وی استعمال نہیں کرن گے۔وزیراعظم نے وفاقی کابینہ دے اجلاس نال خطاب کردیاں ہویاں اکھیا کہ کفایت شعاری حکومت دی اولین ترجیح اے،آئی ایم ایف پروگرام چھیتی مل جائے گا، اک دو آئٹماں رہ گئیاں نیں، ساہنوں ملک و قوم دی بہتری لئی قربانی دینا ہوئے گی۔شہباز شریف نے آکھیا کہ غریب آدمی نے چاہندیاں یا نہ چاہندیاں ہویاں ہر چیلنج وچ قربانی دتی ، عام آدمی نے ملک و قوم لئی ہمیشہ قربانی دتی اے، اج قوم ساڈے ول سوالیہ نگاہواں نال ویکھ رہی اے، مخیر حضرات ملکی بہتری لئی اپنا کردار ادا کرن۔وزیر اعظم نے آکھیا کہ ماضی توں سیکھ کے ساہنوں اگے ودھنا ہوئے گا، اتحادی حکومت ملک و قوم دی بہتری لئی پورے اخلاص نال دن رات کوشاں اے، وزیر، مشیر تے سرکاری افسر سادگی نوں اپنان، پاکستانی قوم اک توانا قوم اے جس نے ہر مشکل دا بہادری نال مقابلہ کیتا۔