جیل بھرو تحریک آئین دی حفاظت لئی اے’ پرویزالٰہی

لہور(پنجابی میڈیا)پاکستان تحریک انصاف دے رہنماوسابق وزیراعلیٰ پنجاب چودھری پرویز الٰہی نے آکھیا اے کہ جیل بھرو تحریک آئین دی حفاظت تے الیکشن لئی اے،حکومت جان لے الیکشن کرواکر ہی جان چھٹنی اے۔جیل بھرو تحریک دے آغاز اُتے اک بیان وچ پرویز الٰہی نے آکھیا کہ تحریک انصاف دے رہنما تے کارکن رضاکارانہ گرفتاریاں پیش کرکے حقیقی آزادی لئی جدوجہد کررہے نیں ، عمران خان دی کال اُتے عوام تے پارٹی کارکن جیلاں وچ جان لئی تیار نیں ۔اوہناںنے آکھیا کہ آئین نال کھیڈن والے حکمران اپنے لئی خودآرٹیکل 6 دی راہ ہموار کررہے نیں ، عوام عمران خان دے نال اے ایہی خوف پی ڈی ایم نوں الیکشن توں روکے ہوئے اے۔اوہناں نے آکھیا کہ آئین دے تحفظ لئی جدوجہد وچ قوم عمران خان دے نال اے۔