اعلی عدلیہ دے2ججاں دا مسلم لیگ (ن)لئی رویہ متعصبانہ اے،راناثناء اللہ

اسلام آباد(پنجابی میڈیا)وفاقی وزیرداخلہ راناثناء اللہ نے اعلی عدلیہ دے2ججاںدا(ن)لیگ نال رویہ متعصبانہ قرار دیندیاں ہویاں آکھیا اے کہ دونوں جج نوازتے شہباز شریف بارے درجناں مقدمیاں وچ مخالف فیصلے دے چکے نیں۔اک بیان وچ رانا ثناء اللہ نے آکھیا کہ اعلی عدلیہ دے2ججاں دا مسلم لیگ(ٰن)لئی رویہ متعصبانہ اے،اوہناں وچوں اک جج نوازشریف دے کیس وچ نگران جج رہے لہذا اوہناں توں انصاف دی توقع نہیں تے دُوجے جج دی آڈیو لیک دا ناقابل تردید ثبوت آچکیا اے،اوہناں دی غیر جانبداری اُتے سوال اٹھ چکیا اے۔اوہناں نے آکھیا کہ دونوں جج نوازتے شہبازشریف بارے درجناں مقدمیاں وچ مخالفانہ فیصلے دے چکے نیں ، پاناما، پارٹی لیڈر شپ، پاک پتن الاٹمنٹ کیس تے رمضان شوگر ملزکیس ایس فہرست وچ شامل نیں ،وزیر داخلہ نے آکھیا کہ قنون تے عدالتی روایت اے کہ متنازعہ جج متعلقہ مقدمے دی سماعت نال خونوں وَکھ کرلیندے نیں،متاثرہ فریق دی درخواست اُتے وی متنازعہ جج دے بینچ توں وَکھ کردتے جان دی روایت اے لہذا (ن)لیگ قنونی ٹیم اوینہاں ججاں نوں نواز شریف تے ہوراں رہنماواں دے مقدمیاں توں وَکھ ہون دا آکھے گی، دوناں ججاں توں آکھیا جائے گا کہ اوہ مسلم لیگ(ن)دے مقدمے نہ سنن۔