سپریم کورٹ نے سائفر معاملے دی تحقیقات لئی دائر اپیلاں مستردکردتیاں

اسلام آباد( پنجابی میڈیا)سپریم کورٹ آف پاکستان نے سائفر معاملے دی تحقیقات لئی دائر تینوں اپیلاں مسترد کردتیاں۔سائفر تحقیقات لئی اپیلاں ایڈووکیٹ ذوالفقار بھٹہ، سید طارق بدر تے نعیم الحسن نے دائر کیتی سی،رجسٹرار سپریم کورٹ نے اپیلاں اعتراض عائد کردیاں ہویاں واپس کردتیاں سن،درخواست گزاراں نے رجسٹرار آفس دے اعترضات دے خلاف چیمبر اپیلاں دائر کیتیاں سن۔سپریم کورٹ دے سینئر جج جسٹس قاضی فائز عیسی نے درخواستاںاُتے عائد اعتراضات دے خلاف درخواستاں اُتے سماعت کیتی۔دوران سماعت جسٹس قاضی فائز عیسی نے استفسار کیتا کہ کیا فارن افیئرز ڈیل کرنا عدالت دا کم اے؟جس ویلے سائفر سامنے آیا وزیراعظم کیہڑاسی؟جواب وچ عدالت نوں دسیا گیا کہ اوس ویلے عمران خان وزیراعظم سن،عمران خان نے بطور وزیر اعظم سائفر جلسے وچ لہرایا سی۔جسٹس قاضی فائز عیسی نے استفسار کیتا کہ بطوروزیراعظم عمران خان کول تحقیقات کروان دے سارے اختیار سن،کیا بطوروزیراعظم عمران خان نے معاملے اُتے تحقیقات دا کوئی فیصلہ کیا؟وزیراعظم دے ماتحت ساریاں اتھارٹیاں ہُندیاں نیں،ایس سائفر دے معاملے وچ عدالت کیہ کرے؟درخواست گزار دے وکیل نے آکھیا کہ سائفر دی تحقیقات بنیادی حقوق دا معاملہ اے، جس اُتے جسٹس قاضی فائز عیسی نے استفسار کیتا کہ سائفر توں تہاڈی تے میری زندگیاں اُتے کیہ اثر پئیا؟ایس کیس وچ بنیادی حقوق دا کوئی معاملہ نہیں۔