سپریم کورٹ دا90دناں وچ الیکشن کران دا حکم

اسلام آباد( پنجابی میڈیاگروپ)پنجاب،خیبرپختونخوا(کے پی)الیکشن ازخود نوٹس کیس وچ سپریم کورٹ نے دوناں صوبیاں وچ الیکشن90دناں وچ کران داحکم دے دتا۔چیف جسٹس عمر عطا بندیال نے پچھلے دناں محفوظ کیتا گیا فیصلہ سُنایا۔سپریم کورٹ نے اپنے فیصلے وچ پنجاب تے کے پی وچ الیکشن90دناں وچ کران دا حکم دتا اے،سپریم کورٹ نے فیصلہ دو دے مقابلے وچ 3دی اکثریت نال دتا اے، بینچ دی اکثریت نے درخواست گزاراں نوں ریلیف دتا اے۔فیصلے وچ5 رکنی بینچ دے 2 ممبراں نے درخواستاں دے قابل سماعت ہون اُتے اعتراض کیتا،جسٹس منصور علی شاہ تے جسٹس جمال مندوخیل نے فیصلے نال اختلاف کیتا۔سپریم کورٹ دا کہنا اے کہ جنرل الیکشن داطریقہ کار مختلف ہُندا اے، آئین وچ الیکشن لئی60 تے90دن دا ویلا دتا گیا اے، اسمبلی دی تحلیل توں بعد90دناں وچ الیکشن ہونا لازمی اے، پنجاب اسمبلی گورنر دے دستخط نہ ہون اُتے48گھنٹے وچ خود تحلیل ہوئی جدکہ کے پی اسمبلی گورنر دی منظوری اُتے تحلیل ہوئی۔فیصلے وچ آکھیا گیا اے کہ گورنر نوں آئین دے تحت تِناں صورتاں وچ اختیارات دتے گئے، گورنر آرٹیکل112دے تحت، دُوجا وزیراعلی دی ایڈوائس اُتے اسمبلی تحلیل کردے نیں، آئین داآرٹیکل222کہندا اے کہ الیکشن وفاق دا سبجیکٹ اے، الیکشن ایکٹ گورنر تے صدر نوں الیکشن دی تریخ دے اعلان دا اختیار دیندا اے، اگر اسمبلی گورنر نے تحلیل کیتی تے تریخ دااعلان وی گورنرکرے گا،اگر گورنر اسمبلی تحلیل نہیں کرداتے صدر مملکت سیکشن57دے تحت اسمبلی تحلیل کرن گے۔سپریم کورٹ دا کہنا اے کہ صدر مملکت نوں الیکیشن دی تریخ دے اعلان دا اختیار حاصل اے، الیکشن دی تریخ دااعلان کرن دی آئینی ذمہ داری گورنر دی اے،گورنر کے پی نے الیکشن دی تریخ دا اعلان نہ کرکے آئینی ذمہ داری توں انحراف کیتا،الیکشن کمیشن فوری طور اُتے صدرمملکت نوںالیکشن دی تریخ تجویز کرے،الیکشن کمیشن نال مشاورت توں بعدصدرپنجاب وچ الیکشن دی تریخ دا اعلان کرن، گورنر کے پی صوبائی اسمبلی وچ الیکشن دی تریخ دااعلان کرن، ہر صوبے وچ الیکشن آئینی مدت دے اندر ہونے چاہیدے نیں۔عدالت عظمی دا کہنا اے کہ الیکشن کمیشن صدر تے گورنر نال مشورے دا پابند اے،9اپریل نوں الیکشن ممکن نہیں تے مشاورت توں بعد پنجاب وچ تریخ بدلی جاسکدی اے۔سپریم کورٹ نے حکم دتا اے کہ سارے وفاقی تے صوبائی ادارے الیکشن لئی الیکشن کمیشن دی معاونت کرن، وفاق الیکشن کمیشن نوں الیکشن لئی ساریاں سہولتاں فراہم کرے، عدالت الیکشن بارے ایہ درخواستاں قابل سماعت قرار دے کے نمٹاندی اے۔چیف جسٹس نے جسٹس منصور علی شاہ تے جسٹس جمال مندوخیل دے اختلافی نوٹ وی پڑھ کے سنائے۔