سرکار کول کوئی پلان نہیں، ملک اقتصادی تباہی ول جا رہیا اے: بلاول بھٹو
لہور: چیئرمین پیپلزپارٹی بلاول بھٹو آکھیا اے سرکار کول کوئی معاشی پلان نہیں، نااہلی دا نقصان عوام چک رہے نیں۔ سرکار نے معیشت دی ساہواں روک لئیاں، ملک اقتصادی تباہی ول جا رہیا اے۔
بلاول بھٹو دا لہور وچ تقریب نال خطاب کردیاں کہنا سی پاکستان دی معاشی صورتحال بہت خراب جد کہ مزدور تے کسان دا بھیڑا حال اے۔ پاکستان اقتصادی تباہی ول جا رہیا اے۔
غیر ملکی اقتصادی ماہرین پاکستان دی معیشت نوں زیادہ نہیں جاندے، سانوں پاکستانی ماہرین دی رائے نوں سننا چاہیدا اے۔ اوہناں آکھیا سرکار کول معیشت دا کوئی پلان نہیں اے۔ پہلاں فیصلہ کیتا گیا آئی ایم ایف کول نہیں جاواں گے فیر اوہدے سارے مطالبات من لئے۔
چیئرمین پیپلزپارٹی آکھیا نکے دکانداراں سنے ہر کوئی پریشان اے۔ حکومت اپنے ای ٹیکس ٹارگٹ نوں پورا نہیں کر سکی تے عوام دا معاشی قتل کر رہی اے۔ سارا بھار عام بندے تے پایا جا رہیا اے۔
