بالاں نوں کہندا اے سڑکاں اُتے مار کھائو،کارکن دی موت دا کون ذمہ دار اے؟مریم نواز

لہور( پنجابی میڈیاگروپ)مسلم لیگ ن دی چیف آرگنائزر و سینئر نائب صدر مریم نواز نے آکھیا اے کہ نوجوان نسل ہی ملک دی قسمت بدلن وچ اپنا کردار ادا کر سکدی اے، عمران قوم دے بالاںنوں کہندا اے سڑکاں اُتے مار کھائو، کل اک کارکن جاں بحق ہویا کون ذمہ دار اے؟(ن)لیگ دی نوجوان قیادت دی تقریب نال خطاب کردیاں ہویاں مریم نواز نے آکھیا کہ مسلم لیگ (ن)دے نویں کوآرڈی نیٹرز دی تعنیاتی اتے مبارکباد پیش کردی ہاںچیف آرگنائزر ن لیگ نے آکھیا کہ افسوس نوجواناں نوں سیاسی ایندھن تاں بنایا جاندا اے لیکن اوہناں بارے کوئی نہیں سوچ دا، اگر کسی جماعت کول نوجواناں دی ترقی لئی پلان اے تے اوہ(ن) لیگ اے، آن والی پارلیمنٹ وچ سب توں وَدھ تعداد نوجواناں دی ہوئے گی ۔ اوہناں نے آکھیا کہ یوتھ پاکستان دے سب توں وڈے سٹیک ہولڈر نیں، مسلم لیگ (ن)نے پہلا یوتھ پروگرام دتا سی، اسیں یوتھ لئی صرف نعرے نہیں عملی کم کیتے، نوجواناں نوں صرف سیاسی ایندھن نہیں بنانا مواقع وی دینے نیں ، نوجواناں دا کم صرف جلسے، ریلیاں وچ مار کھانا نہیں اے۔ مریم نواز نے آکھیا کہ پہلاں جیل بھرو دی کال تے فیر ریلی دی کال دتی گئی، خود چھپ کے بیٹھیا رہیا تے قوم دے بال باہر سن، دنیا دی کیہڑی ایسی تحریک اے جیہڑا لیڈر چھپ کے بیٹھے تے نوجوان باہر ہون، اوس دے اپنے بال لندن وچ سیف جگہ اُتے بیٹھے نیں، کیا نوجواناں دا لیڈراینج داہوئے گا؟ کل اک کارکن جاں بحق ہویا کون ذمہ دار اے؟ نوازشریف نے ملک دے نوجواناں نوں اپنی شیلڈ نہیں بنایا، ایہ ہُندا اے لیڈر تے گیدڑ وچ فرق؟