حکومت عمران خان دی مقبولیت توں گھبرائی ہوئی اے،شاہ محمود قریشی

لہور(پنجابی میڈیاگروپ)پاکستان تحریک انصاف دے وائس چیئرمین شاہ محمود قریشی نے آکھیا اے کہ حکومت عمران خان دی مقبولیت توں گھبرائی ہوئی اے،سیاسی سرگرمیاں توں توجہ ہٹان لئی ساہنوں جھوٹے کیساں وچ پھسایا جارہیا اے،اوہناں دی کوشش اے کہ عمران خان نوں گرفتار کیتا جائے لیکن تریخ دَس چکی اے کہ مائنس ون فارمولا نہ کَدی پہلاں چلیا نہ ہُن چلے گا،بظاہر پنجاب وچ نگران سیٹ اپ اے لیکن عملا پی ڈی ایم سوچ نظر آندی اے۔سیشن عدالت لہور وچ میڈیانال گل بات کردیاں ہویاں اوہناں نے آکھیا کہ حکومت سمجھدی اے کہ عمران خان نوں جیل وچ پان نال حکومت نوں الیکشن جتن وچ آسانی ہوئے گی۔حکومت سمجھدی اے کہ مائنس ون فارمولے نال حکومت لئی آسانی ہوئے گی لیکن تریخ دس چکی اے کہ مائنس ون فارمولا نہ کَدی پہلاں چلیا نہ ہُن چلے گا ۔ عمران خان دی گرفتاری اُتے قنونی رستہ اپناواں گے۔شاہ محمود قریشی نے آکھیا کہ اسیں اک پارٹی دے قنون نوں منن والے ہاں، اسیں عدلیہ دا ہمیشہ احترام کیتا تے آئندہ وی کراں گے۔