پنجاب وچ انشا اللہ عمران خان دی حکومت دوبارہ قائم ہوئے گی،پرویزالہی

لہور(پنجابی میڈیاگروپ)سابق وزیراعلی پنجاب و مرکزی صدر پاکستان تحریک انصاف چودھری پرویز الہی نے آکھیا اے کہ کوئی سرکاری ادارہ الیکشن وچ تعاون توں انکار کرے گا تے ذمہ دار براہ راست وزیر اعظم ہون گے۔چودھری پرویز الہی نال پارٹی رہنماواں نے ملاقات کیتی، جس وچ گل بات کردیاں ہویاں اوہناں نے آکھیا کہ آئینی طور اُتے کوئی ادارہ الیکشن وچ تعاون توں انکار نہیں کر سکدا، سپریم کورٹ دے حکم اُتے پنجاب وچ الیکشن دی تریخ دا اعلان ہو چکیا اے۔سابق وزیر اعلی پنجاب نے آکھیا کہ وزیر اعظم شہباز شریف اگر سپریم کورٹ دے حکم اُتے عملدرآمد وچ رکاوٹ بنن گے تے یوسف رضا گیلانی ونگوںگھر جاون گے۔پرویز الہی دا کہنا سی کہ لہور وچ8مارچ نوں زمان پارک وچ نگران وزیراعلی نے سانحہ ماڈل ٹائون دی خونی تریخ دہرائی اے، ایس خونریزی دا حساب نگران وزیراعلی نوں ہر صورت دینا پئے گا، رانا ثنا اللہ سانحہ ماڈل ٹائون، سانحہ 25 مئی تے سانحہ زمان پارک وچ براہ راست ملوث نیں ۔ سابق وزیر اعلی پنجاب نے آکھیا کہ وفاقی وزیر داخلہ بوہت چھیتی قنون دے شکنجے وچ ہون گے تے اپنے انجام نوں پہنچن گے، الیکشن دی تریخ دے اعلان توں بعد پنجاب وچ انشا اللہ عمران خان دی حکومت دوبارہ قائم ہون وچ ہُن کوئی رکاوٹ باقی نہیں رہی۔