پی ٹی آئی کارکن علی بلال دا پوری طرح کیس لڑاں گے،عمران خان

لہور( پنجابی میڈیاگروپ)پاکستان تحریک انصاف دے چیئرمین تے سابق وزیر اعظم عمران خان نے آکھیا اے کہ پی ٹی آئی دے شہید کارکن علی بلال دا پوری طرح کیس لڑاں گے، نگران وزیر اعلی، آئی جی، سی سی پی او دے خلاف کیس کراں گے۔اپنے ویڈیو لنک خطاب وچ اوہناں دا کہنا سی کہ ایس ویلے ملک وچ بدترین مارشل لا ادوار توں وی وَدھ سختی کیتی جا رہی اے، کفردا نظام چل سکدا اے لیکن ظلم دا نہیں، عدالت نے میری تقریر اُتے پابندی ہٹان دا حکم دتا لیکن ایس دے باوجود نہیں وکھایا گیا، ہُن ظل شاہ دے والد اُتے زور لایا جا رہیا اے کہ اوہ کیس توں پیچھے ہٹ جائے، ایہ کوراپ کون کر رہیا اے تے کس کول اینہی طاقت اے۔عمران خان نے آکھیا کہ پلس والے کہہ رہے نیں، اوہناں نے اینج نہیں کیتا، کون اینہاں طاقت ور اے جیہڑا میرا جے آئی ٹی داریکارڈ غائب کر رہیا اے، عدالت دے حکم دے باوجود سابق سی سی پی او لہورنوں بحال نہیں کیتا گیا، گورنر خیبرپختونخوا الیکشن دی تریخ نہیں دے رہا ، کون ایس دے پیچھے کھڑا اے جیہڑاالیکشن دی تریخ نہیں دے رہیا۔اوہناں نے آکھیا کہ پاکستانیاں نے فیصلہ کرنا اے کیا تباہی دے رستے اُتے چلنا اے،ساڈے کول 2 رستے نیں، اک غلامی تے دُوجا حقیقی آزادی دا رستہ اے، حکمراناں نے ملک تباہ کر دتا اے، ملک ہُن تباہی دت رستے جا رہیا اے ۔ عمران خان نے آکھیا کہ اگرعلی بلال ورگا واقعہ برطانیہ وچ ہُندا تے قوم باہر نکل آندی، زرداری، نواز شریف، شہباز شریف ورگے جرائم پیشہ افراد ملک لٹ رہے نیں، اوہناں دے پیسے باہر پئے نیں، اوہناں نوں کوئی فرق نہیں پئے گا، قوم نوں کہندا ہاں ایہ ویلا اے سب نوں ظلم دے خلاف کھڑا ہونا ہوئے گا۔