حملیاں دا خدشہ:سیکیورٹی اداریاں داالیکشن کمیشن نوں الیکشن نہ کروان دا مشورہ

اسلام آباد(پنجابی میڈیا)آئی ایس آئی، آئی بی تے سی ٹی ڈی نے حملیاںدے خدشیاں دے پیش نظر الیکشن کمیشن نوں پنجاب تے خیبر پختون خوا وچ الیکشن نہ کران دا مشورہ دے دتا۔چیف الیکشن کمشنر دی زیر صدرات الیکشناُتے سیکیورٹی بارے اک اہم اجلاس منعقد ہویا جس وچ حساس اداریاں دے حکام وی رَلتی سن۔اجلاس وچ آئی ایس آئی ولوں سیکٹر کمانڈر اسلام آباد، سیکٹر کمانڈر پنجاب تے سیکٹر کمانڈر خیبر پختونخوا، انٹیلی جنس بیورو(آئی بی)ولوں جوائنٹ ڈائریکٹر پنجاب تے جوائنٹ ڈائریکٹر خیبر پختونخوا، ڈی آئی جی سی ٹی ڈی پنجاب تے ڈی آئی جی خیبر پختونخوا نے وی رَلت کیتی۔ اجلاس وچ سیکورٹی اداریاں نے سیکورٹی دی صورتحال اُتے بریفنگ دتی ۔ الیکشن کمیشن نے سیکیورٹی اُتے گل کردیاں ہویاں دوناں صوبیاں دے الیکشن لئی 3لکھ53ہزار نفری منگ لئی۔ذرائع دا کہنا اے کہ حکام نوں بریفنگ دیندیاں ہویاں دسیا گیا کہ پنجاب وچ پلس دے علاوہ2لکھ97ہزار ہور قنون نافذ کرن والے اداریاں دے اہلکار درکار ہون گے جدکہ خیبر پختون خوا وچ56ہزار ہور نفری درکار ہوئے گی۔اجلاس نوں دسیا گیا کہ دوناں صوبیاں وچ تقریبا67 ہزار پولنگ اسٹیشن قائم کیتے جان گے،پنجاب وچ تقریبا52ہزار جدکہ کے پی وچ15ہزار پولنگ اسٹیشن قائم ہون گے۔ ڈی آر اوز انتہائی حساس پولنگ اسٹیشناں دی نشاندہی کرن گے جدکہ انتہائی حساس پولنگ اسٹیشن وچ سی سی ٹی وی کمیریاں دے علاوہ ہوراں ادریاں دے سکیورٹی اہلکار درکار ہون گے۔ذرائع دا کہنا اے کہ سیکیورٹی اداریاں نے الیکشن کمیشن نوں تھریٹس دیحوالے توں آگاہ کیتا تے سیکورٹی اداریاں نے موجودہ سیکیورٹی تھریٹس دی بنیاداُتے ایس ویلے الیکشن نہ کروان دا مشورہ دے دتا۔ دوران اجلاس خفیہ اداریاں نے الیکشن کران دی متفقہ طور اُتے مخالفت کردتی ۔ ذرائع دا کہنا اے کہ آئی ایس آئی، آئی بی تے سی ٹی ڈی حکام نے رائے دتی کہ پنجاب تے خیبرپختونخوا اسمبلیاں دے الیکشن لئی محول سازگار نہیں۔ اطلاع اے کہ الیکشن کمیشن آئندہ ہفتے ایس بریفنگ اُتے فیصلہ کرے گا۔دریں اثنا الیکشن کمیشن نے پنجاب وچ الیکشن لئی آر اوز، ڈی آر اوز تے اے آر اوز دی تعیناتی کردتی ۔ الیکشن کمیشن نے آکھیا اے کہ پنجاب وچ الیکشن لئی36ڈی آر اوز،297آر اوز تے 594اے آر اوز نوں تعینات کردتا گیا اے جنہاں نوں بیورو کریسی توں لیا گیا اے۔الیکشن کمیشن دے مطابق عورتاں تے اقلیتاں دیاں نشستاں لئی وی آراوزنوں تعینات کردتا گیا اے۔