حکومت نے توشہ خانہ دا21ورھیاں دا ریکارڈ جاری کردتا
اسلام آباد( پنجابی میڈیاگروپ)وفاقی حکومت نے توشہ خانہ دا2002 توں 2023 تک دا 466 صفحیاں اُتے مشتمل ریکارڈ سرکاری ویب سائٹ اُتے جاری کردتا ۔ وزیراعظم دی ہدایت اُتے کابینہ ڈویژن دی سرکاری ویب سائٹ اُتے ریکارڈ اپلوڈ کردتا ۔ تحفے وصول کرن والیاں وچ سابق صدراں، سابق وزریر اعظم، وفاقی وزیر تے سرکاری افسراں دے نام شامل نیں۔ریکارڈ دے مطابق سابق صدر مملکت پرویز مشرف، سابق وزرائے اعظم شوکت عزیز، یوسف رضا گیلانی، نوازشریف، راجہ پرویز اشرف تے عمران خان سنے ہوراں دے نام شامل نیں جدکہ موجودہ وزیر اعظم شہباز شریف تے صدرعارف علوی دا توشہ خانہ ریکارڈ وی اپلوڈ کیتا گیا اے۔وزیراعظماں دے علاوہ وفاقی وزیر، اعلی حکام تے سرکاری ملازماں نوں ملن والے تحفیاں دا ریکارڈ وی پبلک کیتا گیا اے۔گھٹ مالیت دے بیشترتحفے وصول کنندگان نے قنون دے مطابق بغیر ادائیگی دے ہی رکھ لئے کیونکہ 2022 وچ 10000روپے توں گھٹ مالیت دے تحفے بغیر ادائیگی دے رکھن دا قنون سی۔ایس دے علاوہ10000 توں4لکھ روپے تک دے تحفے 15 فیصد رقم دی ادائیگی دے نال رکھن دی اجازت سی جدکہ 4لکھ توں وَدھ مالیت دے تحفے صرف صدر یا حکومتی سربراہواں نوں رکھن دی اجازت سی ۔ ریکارڈ دے مطابق2004 وچ جنرل پرویز مشرف نوں ملن والے تحفیاں دی مالیت 65 لکھ روپے توں وَدھ ظاہر کیتی گئی،2005وچ جنرل پرویز مشرف نوں ملن والی گھڑی دی قیمت 5لکھ روپے دسی گئی۔ سابق صدر پرویز مشرف نوں مختلف اوقات وچ درجناں قیمتی گھڑیاں تے جیولری بکس ملے جیہڑے اوہناں نے قنون دے مطابق رقم ادا کر کے رکھ لئے سن ۔سابق صدر دی گھر والی بیگم صہبا مشرف نوں6اپریل 2006 نوں ساڑھے 16 لکھ روپے دے تحفے ملے۔ یکم اگست 2007 نوں بیگم صہبا مشرف نوں ملن والے تحفیاں دی مالیت 34 لکھ روپے توں وَدھ اے ۔3 اپریل 2007 نوںبیگم صہبا مشرف نوں ملن والے تحفیاں دی قیمت1کروڑ48روپے لائی گئی جدکہ31جنوری2007 نوں جنرل پرویز مشرف نوں 14لکھ روپے دے تحفے ملے۔سابق وزیر اعظم شوکت عزیز نوں 2005 وچ ساڑھے 8لکھ روپے دی اک گھڑی ملی جیہڑی 3لکھ 55ہزاروچ نیلام ہوئی جدکہ اوہناں نے سینکڑاں تحفے 10ہزار توں گھٹ مالیت ظاہر کر کے بغیر ادائیگی رکھ لئے سن۔شوکت عزیز نوں27 ستمبر 2007 نوں ملن والی گھڑی دی قیمت ساڑھے 13 لکھ روپے لائی گئی،20دسمبر 2006 نوں شوکت عزیز نوں37 لکھ 64 ہزار روپے دے تحفے ملے جیہڑے رکھ لئے گئے جدکہ 2006 وچ اوہناں نے ملن والے کئی تحفے توشہ خانہ وچ دے دتے۔ اوس دے علاوہ شوکت عزیز نوں2جون 2006 نوں ساڑھے 13 لکھ روپے مالیت دی گھڑی وی ملی جدکہ7جنوری 2006 نوں سابق وزیراعظم شوکت عزیز نوں18 لکھ روپے دے تحفے وی ملے۔24فروری 2010 نوں شوکت ترین نے 12 لکھ روپے دی گھڑی توشہ خانہ وچ جمع کرائی۔سابق وزیر اعظم میر ظفراللہ خان جمالی نے تحفہ وچ ملن والا خانہ کعبہ دا ماڈل وزیراعظم ہائوس وچ نصب کروایا جدکہ جنرل (ر)پرویزمشرف دی گھر والی نوں2003 وچ ملن والے اک جیولری بکس دی قیمت 2634387 روپے لائی گئی۔ریکارڈ دے مطابق 2 دسمبر2008 نوں سابق صدرآصف علی زرداری نے 5لکھ مالیت دی گھڑی ادائیگی کرکے خود رکھ لئی جدکہ26جنوری2009 نوں سابق صدرآصف علی زرداری نوں 2 بی ایم ڈبلیو گڈیاں ملیاں جنہاں دی مالیت 5کروڑ78 تے2کروڑ 73 لکھ سی جدکہ 1 ٹویٹا لیکسز وی ملی جس دی مالیت 5 کروڑ روپے سی۔آصف زرداری نے تینوں گڈیاں 2کروڑ 2 لکھ روپے توں وَدھ ادا کر کے آپئی رکھ لئیاں ۔28اکتوبر2011 نوں آصف زرداری نے 16 لکھ 15 ہزار دے تحفے رکھ لئے جدکہ 11 مارچ 2011 نوں آصف زرداری نوں ملن والے تحفیاں دی مالیت 10لکھ روپے توں وَدھ لائی گئی،13 جون2011 نوں 16 لکھ مالیت دے تحفے ادائیگی کر کے رکھ لئے۔ اوس دے علاوہ 15اگست 2011 نوں آصف زرداری نے847,000 روپے دے تحفے خود رکھ لئے۔سابق وزیر اعظم یوسف رضا گیلانی نوں23 دسمبر2009 نوں خانہ کعبہ دے دروازے دا ماڈل تحفے وچ ملیا جیہڑااوہناں نے 6ہزار روپے ادا کر کے رکھ لیا جدکہ اوہناں نے21لکھ روپے ادائیگی کر کے جیولری باکس رکھ لیا ۔ یوسف رضاگیلانی دے بھائی، بھابھی، بیٹے، بیٹی،بھانجے،مہماناں تے ڈاکٹراں وی تحفہ وچ ملن والیاں گھڑیاں رکھ لئیاں۔17 اکتوبر2011 نوں یوسف رضاگیلانی نے 19لکھ روپے دے تحفے خود رکھ لئے۔میاں نوازشریف نوں ملن والی مرسیڈیز دی کل مالیت 4,255,919 روپے لائی گئی سی،20اپریل 2008 نوں سابق وزیراعظم نوازشریف نے تحفہ وچ ملن والیاں مرسیڈیز636,888 روپے ادا کر کے رکھ لئی۔وزیراعلی پنجاب دی حیثیت نال شہباز شریف نوں پندرہ جولائی 2009 وچ جنہے وی تحفے ملے اوہ اوہناں نے توشہ خانہ وچ جمع کروادتے۔ 10جون2010نوں سابق وزیراعلی شہبازشریف نے 40ہزاردیاں پینٹنگاں توشہ خانہ وچ جمع کروائیاں۔ریکارڈ دے مطابق سال2018 وچ سابق وزیراعظم شاہد خاقان عباسی نوں 2 کروڑ50لکھ مالیت دی رولکس گھڑی تحفے وچ ملی جدکہ اپریل 2018 وچ شاہد خاقان عباسی دے بیٹے عبداللہ عباسی نوں 55لاکھ روپے مالیت دی گھڑی ملی۔ ایسی طرح شاہد خاقان دے اک ہور بیٹے نادر عباسی نوں1 کروڑ 70 لکھ روپے مالیت دی گھڑی تحفے وچ ملی جیہڑی اوہناں نے 33 لکھ 95 ہزار روپے جمع کروا کے اپنے کول رکھ لئی ۔ ریکارڈ دے مطابق 2018 وچ وزیراعظم دے سیکرٹری فواد حسن فواد نوں 19 لکھ روپے مالیت دی گھڑی ملی۔ ایس دے علاوہ 2018 وچ وزیراعظم دے ملٹری سیکریٹری بریگیڈئیر وسیم نوں20لکھ روپے مالیت دی گھڑی ملی، جیہڑی اوہناں نے توشہ خانہ وچ 3لکھ 74 ہزار روپے جمع کروا کے اپنے کول رکھ لئی ۔ سابق وزیر اعظم عمران خان نوں سال 2018 وچ قیمتی تحفے موصول ہوئے۔ توشہ خانہ ریکارڈ دے مطابق ستمبر 2018 وچ عمران خان نوں 10 کروڑ 9 لکھ روپے دے قیمتی تحفے موصول ہوئے، جنہاں وچ8 کروڑ50لکھ دی گھڑی سی جیہڑی 18 قیراط سونے دی بنی سی ۔ چیئرمین پی ٹی آئی نے اینہاں تحفیاں دے 2 کروڑ 1 لکھ 78 ہزار روپے توشہ خانہ وچ جمع کروا کے تحفے رکھ لئے سن۔صدر مملکت عارف علوی نوں دسمبر 2018 وچ 1 کروڑ 75 لاکھ روپے دی گھڑی ، قرآن پاک تے ہور تحفے ملے ، جس وچوں اوہناں نے قرآن مجید اپنے کول رکھیا تے ہور تحفے توشہ خانہ وچ جمع کرادتے۔ ایسی طرح دسمبر 2018 وچ خاتون اول بیگم ثمینہ علوی نوں وی 8 لکھ روپے مالیت دا ہار تے51 لکھ روپے مالیت دا بریسلٹ ملیا جیہڑا اوہناں نے توشہ خانہ وچ جمع کروادتا ۔جنوری 2009 نوں صدر عارف علوی نوں قیمتی کلاشنکو اے دے 47 تحفے وچ ملی جس دی مالیت 6 لکھ روپے سی، صدر مملکت نے قنون دے مطابق رقم ادا کر کے اے کے فور سیون اپنے کول رکھ لئی ۔وزارت خارجہ دے چیف پروٹوکول آفیسر مراد جنجوعہ نوں 29 جنوری 2019 نوں 20لکھ روپے مالیت دی گھڑی تحفے وچ ملی، جیہڑی اوہناں نے رقم ادل کرن توں بعد رکھ لئی ۔ستمبر 2018 وچ سابق وزیراعظم دے چیف سیکیورٹی آفیسر رانا شعیب نوں 29 لکھ روپے دی رولکس گھڑی تحفے وچ ملی جدکہ 27 ستمبر 2018 نوں سابق وزیر خارجہ شاہ محمود قریشی نوں 73لکھ روپے مالیت دے تحفے موصول ہوئے جییہڑے اوہناں نے توشہ خانہ وچ رکھوا دتے سن جدکہ 9 فروری 2011 وچ وزیرخارجہ شاہ محمود قریشی نے 2تحفے ادائیگی کر کے رکھ لئے سن۔ایس دے علاوہ مسلم لیگ ن دے رہنما امیر مقام نوں 2005 وچ گھڑی ملی جس دی قیمت ساڑھے 5لکھ روپے ظاہر کیتی گئی سی جدکہ16 اگست 2006 نوں جہانگیر ترین نے ملن والا تحفہ توشہ خانہ وچ جمع کروائے۔ریکارڈ دے مطابق 7 اگست 2006 نوں جنرل(ر)اشفاق پرویز کیانی نوں تحفے ملے جیہڑے اوہناں نے 10ہزار روپے ادا کر کے رکھ لئے جدکہ مئی 2006وچ سابق وزیرخزانہ عمر ایوب نے ساڑھے 4 لکھ روپے دی گھڑی توشہ خانہ وچ دتی۔ سابق سیکرٹری خزانہ سلمان صدیق نوں 29فروری 2010وچ7لکھ دی گھڑی ملی جیہڑی اوہناں نے توشہ خانہ وچ دے دتی۔28دسمبر2010 نوں صحافی رئوف کلاسرا نے 1لاکھ 20ہزار دی گھڑی توشہ خانہ وچ جمع کروائی۔ 5ستمبر2011 نوں سابق اسپیکر قومی اسمبلی فہمیدہ مرزا نے 20ہزاردا کارپٹ توشہ خانہ وچ جمع کروایا تے 22 دسمبر2011 نوں چودہری پرویز الہی نے4لکھ توں وَدھ دے تحفے توشہ خانہ وچ جمع کروائے۔
