عمران خان نے توشہ خانہ دے تحفے ویچ کے3نسلاں دیاں جائیداداں بنا لئیاں:مریم نواز

لہور( پنجابی میڈیاگروپ)مسلم لیگ (ن) دی چیف آرگنائزر مریم نواز نے آکھیا اے کہ فواد چودھری گھڑی دے حوالے نال جھوٹ بول رہیا اے، اوہناں دے بکا صحافی وی جھوٹ بول رہے نیں ۔لہور وچ تقریب نال خطاب کردیاں ہویاں مریم نواز نے آکھیا کہ چاہندی ہاں یوتھ پاکستان دے کم آئے تے پاکستان اگے ودھے، میں لہورکالج توں ایف ایس سی کیتی سی، نوجواناںنوں سمت وکھانا لیڈر شپ دا کم اے،پاکستان نوں بیرونی تھریٹ نہیں اے، پاکستان نوں اندرونی تھریٹ اے، جَد ملک دی گل آئے گی تے اوس اُتے کوئی سمجھوتہ نہیں ہوئے گا ،اج کل سب کجھ آئی ٹی دی بنیاداُتے اے۔ مسلم لیگ (ن) دی چیف آرگنائزر مریم نواز نے ہور آکھیا کہ اسیں ٹیوٹا دے نال مل کے نوجواناں نوں ٹیکنیکل ٹریننگ کروایئے ،اسیں بالاں نوں یوتھ لون دتے ، جماعتاں نوں صرف یوتھ دا نعرہ نہیں لانا چاہیدا، پارلیمنٹ وچ وی یوتھ دی وڈی تعداد ہونی چاہیدی، کِدھرے ایہ گل نہیں ہو رہی کہ یوتھ لئی کیہ کرنا اے، بنگلا دیش کیتھے نکل گیا تے اسیں کیتھے بیٹھے ہاں۔مریم نواز نے آکھیا کہ خود گھر وچ چھپ کے بیٹھے نیں تے مار کھان لئی بالاں نوں سڑکاں اُتے چھڈیا ہویا اے، عمران خان کہندے نیں مریم نواز نوں الیکشن مہم دی آزادی اے مینوں نہیں، مریم نوںایہ آزادی پلیٹ وچ رکھ کے نہیں دتی گئی، 4ورھے جنہاں حالاتاں دااسیں سامنا کیتا اوہناں نوں تاں کسی نے انگلی وی نہیں لائی، عمران خان دی حکومت وچ میرا ملتان وچ جلسہ سی، اوہناں نے جلسہ نہیں کرن دتا۔اوہناں نے ہور آکھیا کہ مینوںگڈی اُتے کھڑے ہو کے جلسہ کرنا پئیا، اج کہندے نیں کہ مریم نواز نوں آزادی اے، ساہنوں کس نے آکھیا اے کہ بیڈتھلے چھپ جا؟ نواز شریف صاحب نے قوم دے کسی بال نوں جیل نہیں گھلیا ، اوہ اپنی بیٹی دا ہتھ پھڑ کے جیل گئے، ظل شاہ دی ماں نے آکھیا عمران خان دے اپنے بال تے باہر بیٹھے نیں، میرا بیٹا مروا دتا، اوہ ظل شاہ دے گھر تک نہیں گئے۔