خاتون جج نوں دھمکی :عمران خان نے بریت دی درخواست دائر کردتی

اسلام آباد(پنجابی میڈیاگروپ)خاتون جج زیبا چودھری نوں دھمکی دین دے کیس وچ عمران خان دے وکیلاں ولوں بریت دی درخواست دائرکردتی گئی ۔ اسلام آباد دی مقامی عدالت وچ چیئرمین پی ٹی آئی عمران خان دے خلاف خاتون جج زیبا چودھری نوں دھمکی دین دے کیس دی سماعت ہوئی، عمران خان دے وکیلاں ولوں بریت دی درخواست دائرکردتی ، وکیل عمران خان نے آکھیا کہ بریت دی درخواست اُتے ملزم دا ہونا ضروری نہیں ،عدالت نے آکھیا کہ اج فرد جرم عائد کرن لئی نہیں کیس دیاں کاپیاں فراہم کرن لئی سدھیا سی ۔ وزیراعظم نوں ملن والیاں سہولتاں تے سکیورٹی بارے دستاویزات عدالت وچ جمع کرا دتی گئی۔ وکیل عمران خان نے آکھیا کہ دستاویزات دے مطابق وزیراعظم نوں سکیورٹی فراہم کیتی جاندی اے، سابق وزیراعظم نوں وی سکیورٹی دتی جاندی اے جیہڑی عمران خان توں واپس لے لئی گئی، عمران خان نوں دوبارہ ٹارگٹ کیتا جا سکدا اے۔