توشہ خانہ کیس: عمران خان دے وارنٹ گرفتاری معطل

اسلام آباد(پنجابی میڈیاگروپ)توشہ خانہ کیس وچ اسلام آباد ہائی کورٹ نے چیئرمین پاکستان تحریک انصاف عمران خان دے وارنٹ گرفتاری معطل کر دتے۔اسلام آباد ہائیکورٹ نے رضاکارانہ پیشی دا عمران خان دا بیان حلفی تسلیم کرکے پلس نوں عمران خان نوں گرفتار کرن توں روک دتا ۔عدالت نے عمران خان نوں کل عدالتی ویلے دے دوران ٹرائل کورٹ وچ پیشی دا حکم دے دتا،چیف جسٹس نے ریمارکس دتے کہ اینج نہ ہوئے کہ کل شام 6وجے عدالت پہنچن، ایہ وی آکھیا کہ عمران خان نوں یقینی بنانا ہوئے گا کل اوہناں دی پیشی پر امن و امان دی صورتحال نہ بنے۔چیف جسٹس نے آکھیا کہ وارنٹ دا مقصد صرف عدالت سامنے پیشی ہی اے، انڈرٹیکنگ دا مطلب عدالت سامنے اک بیان اے، بیان توں انحراف توہین عدالت دے مترادف ہوئے گا ۔ عمران خان دے وکیل خواجہ حارث نے آکھیا کہ عمران خان نوں خطریاں دی انفارمیشن حکومت کول اے، کسی اُتے انگلی نہیں چُکی مگرعمران خان دے کول وی انفارمیشن اے لیکن اوہناں دا کہنا سی کہ چیئرمین تحریک انصاف کل عدالت وچ پیش ہون گے ایس وچ کوئی شبہ نہیں۔