عمران خان پاکستان وچ تشدد دی سیاست کر رہیا اے،احسن اقبال

نارووال( پنجابی میڈیاگروپ)پاکستان مسلم لیگ(ن)دے مرکزی رہنما تے وفاقی وزیر برائے منصوبہ بندی و ترقی احسن اقبال نے آکھیا اے کہ عمران خان پاکستان وچ تشدد دی سیاست کر رہیا اے، جمہوریت وچ ہمیشہ گل بات ہُندی اے تشدد نہیں ہُندا ۔ میڈیا نال گل بات کردیاں ہویاں لیگی رہنما احسن اقبال نے آکھیا کہ عمران خان اپنی انا لئی نوجواناں دی قربانی دینا چاہندا اے، عمران خان دی خواہش اے کہ ہورکئی نوجواناں دیاں لاشاں ڈِگن، ایہ پاکستان نال محبت نہیں کردا ایہ لاشاں دا سوداگر اے۔اوہناں نے آکھیا کہ پاکستان دے آئین تے قنون دے نال کھیڈن دی کسی نوں اجازت نہیں ہونی چاہیدی، عمران خان اپنے کارکناں دیاں لاشاں اُتے سیاست کرن دی کوشش کر رہیا اے، نہتے پلس ملازماں اُتے عمران خان دے کارکناں نے تشدد تے حملے کیتے، پلس ملازماں اُتے پٹرول بم سُٹے گئے جس نال لاتعداد ملازم زخمی ہوگئے۔احسن اقبال دا ہور کہنا سی کہ عمران خان دے نال زیادتی نہیں ہو رہی بلکہ اوہ پاکستان دے آئین قنون تے عدالتاںدے نال زیادتی کر رہیا اے، پاکستان وچ افراتفری تے انتشار پیدا کرکے دنیا نوں دسیا جا رہیا اے کہ اوہناں نال زیادتی ہو رہی اے۔