پی ڈی ایم فوج تے پی ٹی آئی نوں لڑان دی کوشش کررہی اے،عمران خان

لہور( پنجابی میڈیاگروپ)پی ٹی آئی چیئرمین عمران خان نے آکھیا اے کہ اوورسیز پاکستانی دنیا وچ جاکے انسانی حقوق دیاں تنظیماں تے سیاست داناں نوں دسن کہ پاکستان وچ کس طرح انسانی حقوق دی خلاف ورزی ہورہی اے۔لہور وچ ویڈیو خطاب کردیاں ہویاں عمران خان نے آکھیا کہ اوورسیز پاکستانی دنیا وچ جاکر انسانی حقوق دیاں تنظیماں تے سیاست داناں نوں دسن کہ پاکستان وچ کس طرح انسانی حقوق دی خلاف ورزی ہورہی اے، آئین دی کسی نوں کوئی فکر نہیں، جمہوریت نوں قتل کیتا جارہیا اے۔اوہناں نے آکھیا کہ 30 اپریل نوں الیکشن ہونے نیں لیکن موجودہ حکومت الیکشن دی فضا ہی بنن نہیں دے رہی، ساڈی انتخابی ریلی اُتے حملہ کرکے ظل شاہ نوں شہید کردتا گیا، مینار پاکستان جلسے دی اجازت نہیں دے رہے۔اوہناں نے آکھیا کہ اسیں اج انسانی حقوق دیاں عالمی تنظیماںنال رابطہ کراں گے، باہر دے ملک موجود پی ٹی آئی دفتراں ذریعے ملکاں نال رابطے کراں گے، اسیں اپنے چیف جسٹس آف پاکستان نال وی رجوع کراں گے کہ ایتھے کوئی قنون نہیں رہ گیا تے طاقت دے زور اُتے ایتھے خوف پھیلایا جارہیا اے۔عمران خان نے آکھیاکہ ساہنوں تقسیم کرن دی کوشش کیتی جارہی اے، ساڈے پختون ورکراں نوں طالبان تے اَت گرد آکھیا گیا جس اُتے ساڈے پشتون بھائی دا ردعمل سامنے آیا اے، ایہ ثابت کرنا چاہندے نیں کہ اسیںملک وچ ات گردی کررہے ہاں تے انتشار پھیلانا چاہتے نیں

اپنا تبصرہ گھلو