ریاست دی زمین بولی دے بغیر کسے نوں نہیں دتی جا سکدی: سپریم کورٹ

اسلام آباد: سپریم کورٹ نے قرار دتا اے ریاست دی زمین بولی دے بغیر کسے نوں نہیں دتی جا سکدی۔ سپریم کورٹ وچ پنجاب دے شہر وہاڑی وچ پٹرول پمپ لئی سرکاری اراضی نہ دین دے فیصلے دے خلاف اپیل دی سماعت ہوئی۔

درخواست گزار دے وکیل نے لہور ہائی کورٹ دے فیصلے دے خلاف اپیل کردیاں آکھیا میرے موکل نوں 12ورھے لئی لیز ملی جو 30ورھے تک قابل توسیع سی، لہور ہائی کورٹ نے 2011وچ حکم امتناع دتا سی، حکم امتناع دے باوجود دوجے مقدمہ وچ ہائی کورٹ نے زمین خالی کران دا حکم دتا۔ سپریم کورٹ نے اپیل رد کردیاں پٹرول پمپ لئی سرکاری اراضی بولی دے بغیر نہ دین دا ہائی کورٹ دا فیصلہ برقرار رکھیا۔جسٹس فیصل عرب آکھیا سرکاری اراضی 30ورھے لئی لیز تے کیویں دتی جا سکدی اے؟ کسے سرکاری افسر توں خلاف قنون فائدہ ملن نال حق دعویٰ نہیں بن جاندا۔

جسٹس قاضی امین نے ریمارکس دتے جہنوں پٹرول پمپ بنانا اے تے اپنی زمین خرید لوے۔ جسٹس عمر عطاء بندیال آکھیا لیز 2007وچ ختم ہو گئی سی پر توسیع نہیں ملی، ہائی کورٹ دا فیصلہ ٹھیک اے بولی دے بغیر سرکاری زمین نہیں دتی جا سکدی، تہاڈے موکل نے عدالت دے نال غلط بیانی کیتی ایہنوں جیل گھلاں گے، ویلا آ گیا اے ریاستی زمین دا تحفظ کیتا جاوے۔ عدالت نے اپیل رد کردیاں ہائی کورٹ دا فیصلہ برقرار رکھیا۔