آئی ایم ایف نال معاملات چھیتی طے ہو جان گے،وفاقی وزیرخزانہ

اسلام آباد(پنجابی میڈیا گروپ)وفاقی وزیر خزانہ اسحاق ڈاردا کہنا اے کہ معیشت دی بہتری لئی آئی ایم ایف نال چھیتی معاملات طے پا جان گے۔اسلام آباد چیمبر آف کامرس اینڈ انڈسٹری ولوں غیر ملکی سفرا دے اعزاز وچ دتی گئی افطار ڈنر پارٹی وچ بطور اُچیچے پروہنے خطاب کردیاں ہویاں وفاقی وزیر خزانہ محمد اسحاق ڈار نے آکھیا کہ دوست ملکاں دے تعاون توں بعد آئی ایم ایف دے نال چھیتی معاملات طے ہو جان گے جس نال موجودہ مشکلاں اُتے قابو پان وچ مدد ملے گی تے معیشت بحالی ول گامزن ہوئے گی۔وزیرخزانہ نے آکھیاکہ2016 وچ پاکستان دنیا دی24ویں وڈی معیشت سی تے اسیں جی ٹوینٹی وچ شامل ہون دا سوچ رہے ساں لیکن ایس ویلے ساڈی معیشت نوں سنگین معاشی چیلنجاں دا سامنا اے۔اسحاق ڈار نے دعوی کیتا کہ پاکستان ڈیفالٹ نہیں کرے گا۔ اوہناں نے ہور آکھیا کہ حکومت معیشت نوں پائیدار ترقی اُتے پان لئی ہر ممکن کوشش کر رہی اے۔ وفاقی وزیر خزانہ نے سفرا دے اعزاز وچ افطار ڈنر دا اہتمام کرن اُتے آئی سی سی آئی دے اقدام نوں سراہیا۔