سپریم کورٹ جج آمنے سامنے ہون تے پارلیمنٹ نوں کردار ادا کرنا چاہیدا اے،وزیرداخلہ

اسلام آباد(پنجابی میڈیاگروپ)وفاقی وزیر داخلہ رانا ثنا اللہ خان نے واضح کیتااے کہ،قنون تے آئین وچ سقم نوں دور کرنا پارلیمنٹ دی ذمہ داری اے،انصاف دے تقاضے پورے کرن لئی فل کورٹ تشکیل دتا جائے ، سب نوں قنون دی حکمرانی وچ کردار ادا کرنا چاہیدا اے،فتنہ خان ملک وچ انارکی تے لاقانونیت پھیلانا چاہندا اے ،جَد میدان لگے گا تے پتہ چل جائے گا کون کِنا مقبول اے۔ اوہ بدھ نوںایتھے وفاقی وزیر مذہبی امور مفتی عبدالشکور تے جے یو آئی دے سیکرٹری جنرل مولا نا عبدالغفور حیدری دے ہمراہ میڈیا نال گل بات کر رہے سن ۔ وفاقی وزیر داخلہ رانا ثناء اللہ خان نے آکھیا کہ اسیں عدالت عظمی توں انصاف چاہندے ہاں، اسیںچاہندے ہاں کہ ملکی سیاست وچ رواداری ،قنون وآئین دی حکمرانی وچ عدالت عظمی اپنا کردار ادا کرے ، ایس کردارنال وی توازن آئے گا ،ایس توں پہلاں بدقسمتی نال اینج دے فیصلے ہُندے رہے نیں جنہاں اُتے شکوک و شبہات اٹھے نیں۔ اوہناںنے اکھیا کہ اک فیصلہ ہویا اے ایہ 3 ،2 دا فیصلہ اے ، یا 4، 3 دا ، ایہ ابہام دور ہونا چاہیدا اے ، ایس ابہام نوں لارجر بینچ یا فل کورٹ ہی دور کر سکدا اے ، ایہ ہی استدعا ساڈے ولوں وی رہی اے۔