عمران خان قنون دا سب توں وڈا مفرور، نااہلی اوس دا انتظار کر رہی اے، مریم نواز

قصور(پنجابی میڈیاگروپ)پاکستان مسلم لیگ ن دی چیف آرگنائزرتے سینئر نائب صدر مریم نواز شریف نے آکھیا اے کہ گیدڑنوں لیڈر دا ماسک پاون دی ہر ممکن کوشش کیتی گئی لیکن اندروں گھڑی چور نکلیا، عمران خان قنون دا سب نوں وڈا مفروراے، نا اہلی اوس دا انتظار کر رہی اے ۔کھڈیاں خاص وچ جلسہ عام نال خطاب کردیاں ہویاں اوہناں نے آکھیاکہ قصوردے شیراں تے شیرنیاںنوں محمد نواز شریف تے مریم نوازدا سلام ، کھڈیاں والیاں مینار پاکستان اُتے جلسہ کرن والیاں نوں کُھڈے وچ سُٹ دتا ۔ مریم نواز نے آکھیا کہ سوچیا وی نہیںسی کہ پورا کھڈیاں باہر آجائے گا، ملک احمد خان زندہ باد، کھڈیاں تے قصور کل تے اج وی نوازشریف نال محبت کردا اے۔چیف آرگنائزر ن لیگ نے آکھیا کہ جنے مرضی ’’پامبڑ‘‘ مچ جان سچ بولن توں باز نہیں آؤاںگی،5 ورھے اینہاں ’’پامبڑاں‘‘ توںلنگ کے آئی ہاں نہیں ڈراں گی، قصور والیاں دا شعور بوہت زبردست اے، جَد الیکشن چوری کیتا گیا قصورتوں پوریاں سیٹاں جیتیاں سن، کھڈیاں والیاں نے سب توں پہلاں گھڑی چورنوں پہچانیا سی۔مریم نواز نے آکھیا کہ پوری دنیا جان گئی اے ایہ فتنہ حکومت وچ ہویا تے تباہی تے بربادی اے، گیدڑ نوں لیڈردا ماسک پاون دی پوری کوشش کیتی گئی، سہولت کار جَد اللہ نوں پیارے ہو گئے تے ماسک اُتریا تے گھڑی چور نکلیا۔اوہناں نے آکھیا کہ جَد لیڈردا ماسک نکلیا تے توشہ خانہ چور نکلیا، جَد لیڈردا ماسک اُتریا تے ہیریاں دے سیٹ لین والا نکلیا، پچھلے6 توں7ورھے گدھے اُتے لکیراں پا کے زیبرا بنان دی کوشش کیتی گئی، گدھا تے گدھا ہی ہُندا اے، سہولت کار ہٹے تے گدھے دیاں لکیراں مٹ گئیاں، ہُن اوہ گدھا ریاست نوں لَتاں مار رہیا اے ۔ مریم نواز نے آکھیا کہ جس طرح اوس دی درگت بنی سہولت کاراں نے وی کناں نون ہتھ لالئیا، کہندا سی کہ قنون سب لئی برابر اے، اج قنون دا ایہ سب توں وڈا مفرور اے، جَد عدالتاں نے اکھیا پیش ہو تے پلاسٹر اُترن دا نام نہیں لے رہیا، چھتاں دے لینٹر کھل جاندے نیں لیکن5مہینیاں توں پلاسٹر نہیں اُتر رہیا، کَدی کہندا اے لَت ٹُٹی تے کَدی کہندا اے72ورھیاں دا بزرگ ہاں ۔ مسلم لیگ ن دی سینئر نائب صدر نے آکھیا کہ عدالت پیش نہیں ہُندا چارپائی دے تھلے چُھپ جاندا اے ، جَد پلس زمان پارک جاندی اے تے اوہناں اُتے پٹرول بم سُٹ دا اے، تُسی ات گرد او، ساڈے جلسے وچ لکھاں لوگ ہُندے نیں کسی نوں پٹرول بم تے غلیل چلانی نہیں آندی، معصوم سا چہرہ بنا کے کہندا اے کہ گھر وچ گھر والی اکیلی سی، اگر تیری گھر والی اکیلی سی تے اندروں جِن پٹرول بم سُٹ رہے سن، کیا پلس دے سر تیرے موکلات پھاڑ رہے سن۔