عمران خان نے حکومت نال بیٹھن توں انکارکردتا

لہور(پنجابی میڈیاگروپ)پاکستان تحریک انصاف دے سربراہ تے سابق وزیراعظم عمران خان نے آکھیا اے کہ اوہ حکومت دے نال مذاکرات وچ نہیں بیٹھن گے تے اگر گل بات ہوئی تے اوہ اوہناں دی پارٹی دے ہور اراکان کرن گے،اگر گل الکشن ول نہیں جاندی تے فیر مذاکرات دا کوئی فائدہ نہیں ،سپریم کورٹ دے ججاں دی وَنڈ پیچھے نواز شریف دا ہتھ اے، ایہ اوہناں دی پرانی روش اے ، فیصلہ نہ منن والے تُسی ہندے کون او ؟تہاڈی حیثیت کیہ اے،تحریک انصاف عدالت عظمیٰ دا بھرپور ساتھ دیوے گی، جنرل باجوہ دے جان توں بعد کوئی تبدیلی نہیں آئی ،اوہی پالیسیاں چل رہیاں نیں ،ایس نال وی کئی شدت پھڑ رہیاں نیں،2018ء وچ ساہنوں اینہیاں سیٹیاں نہیں ملیاں جیہڑیاںساہنوں ملنیاں چاہیدیاں سن، ساہنوں کنٹرول کرن لئی ساڈیاں نشستاں گھٹ کروائیاں سن۔ اک انٹرویووچ سابق وزیراعظم عمران خان نے آکھیا کہ اوہ حکمراناں دے نال بیٹھن نوں تیار نہیں ، اگر مذاکرات شروع ہُندے نیں تے اوہناں دی ٹیم ایس وچ حصہ لئے گی اوہ نہیں۔حکومتی وزیراں ولوں گرینڈ نیشنل ڈائیلاگ تے خود تحریک انصاف ولوں مذاکرات دی پیشکش بارے پچھے گئے سوالاں دے جواب وچ عمران خان ہوراں آکھیا کہ اگر مذاکرات ہوں گے تے اوہ صرف الیکشن دے نقطے اُتے ہون گے لیکن اوہ خود اوہناں لوکاں دے نال نہیں بیٹھاں گے جنہاں نوں اوہ چورتے کرپٹ کہندے رہے نیں،میں نے تے خیراینہاں لوکاں دے ساتھ نہیں بیٹھنا، ساڈی ٹیم بیٹھے گی لیکن گل تے صرف الیکشن دی اے۔