حکومت نے التوا بارے مواد نہیں دتا:چیف جسٹس،الیکشن کیس دا فیصلہ محفوظ

اسلام آباد(پنجابی میڈیا گروپ)پنجاب تے کے پی الیکشن لئی تحریک انصاف دی درخواست اُتے سپریم کورٹ نے فیصلہ محفوظ کر لئیا جیہڑا کل سُنایا جائے گا ۔ پنجاب تے کے پی وچ الیکشن بارے کیس دی سماعت چیف جسٹس دی سربراہی وچ3رُکنی بینچ نے کیتی، عدالت عظمی نے فریقیاں دے دلائل مکمل ہون دے بعد کیس دا فیصلہ محفوظ کر لئیا اے جیہڑا کل سُنایا جائے گا۔وکیل علی ظفر نے اپنے حتمی دلائل وچ آکھیا کہ کے پی کے میں گورنر نے الیکشن کی تاریخ دینی ہے، کیا الیکشن کمیشن گورنر کی تاریخ بدل سکتا ہے؟ میری نظر میں الیکشن کمیشن آئین توں بالاتر اقدام نہیں کرسکدا،بلدیاتی الیکشن وچ الیکشن کمیشن تریخ مقرر کردااے۔بیرسٹر علی ظفر نے ہور آکھیاکہ الیکشن کمیشن نے سارا ملبہ وفاقی تے صوبائی حکومتاں اُتے پایا اے، الیکشن کمیشن دے وکیل نے آکھیا وسائل مل جان تے الیکشن لئی تیار نیں، سجیل سواتی نے آکھیا کہ الیکشن کمیشن اپنی ذمہ داری پوری کرن نوں تیار اے۔ دوران سماعت چیف جسٹس نے ریمارکس وچ آکھیا کہ اینج دے حالات وی ہو سکدے نیں جَد الکشن ملتوی ہو سکن، وفاقی حکومت نے اینج داکوئی مواد نہیں دتا جس اُتے الیکشن ملتوی ہو سکن ،الیکشن دے رستے وچ حائل رکاوٹاں توں وی آگاہ نہیں کیتا گیا، عدالت نے توازن قائم کرنا ہندا اے، حکومت تے ہور فریقاں دی درست معاونت نہیں ملی۔چیف جسٹس نے ہور آکھیا اے کہ حکومت نے الیکشن کروان دی آمادگی ہی نہیں ظاہر کیتی، ماضی وچ عدالت اسمبلی دی تحلیل کالعدم قرار دے چکی اے، ماضی وچ حالات مختلف سن، ملک وچ کوئی سیاسی مذاکرات نہیں ہو رہے، رکاوٹاں توں آگاہ کرن دی ذمہ داری وفاقی حکومت دی سی، وزارت دفاع تے وزارت خزانہ دی وجوہات وی ویکھاں گے۔