موجودہ بینچ توں فیصلہ کرانا انصاف دے تقاضیاں دے منافی اے:وزیراعظم

اسلام آباد(پنجابی میڈیا گروپ)وزیر اعظم شہباز شریف نے آکھیا اے کہ موجودہ بینچ توں فیصلہ کرانا انصاف دے تقاضیاںدے100فیصد منافی اے۔قومی اسمبلی دے اجلاس چو اظہار خیال کردیاں ہویاں وزیر اعظم نے آکھیا اے کہ پوری اتحادی حکومت نے موجودہ بینچ اُتے عدم اعتماددا اظہار کیتا، کاش اجے وی چیف جسٹس اینہاں 3 ججاں دے مائنس فل کورٹ نوں بٹھا دیون تے فیصلہ قوم نوں منن وچ دقعت نہیں ہوئے گی، کجھ دن پہلاں ایوان نوں اپنی معروضات پیش کیتی سی، چیف جسٹس صاحب نے سماعت دے دوران ریمارکس دتے کئی لوگ جیلاں کٹ کے تقریراں کر رہے نیں۔وزیراعظم نے آکھیا کہ جناب سپیکر!جیل کٹنا ایس لئی پاکستان دی تریخ بھری پئی اے، کریمنل کیس وچ جیل کٹنا انصاف پسند معاشرے وچ بوہت تحقیر دی گل اے، عمران خان دور وچ صرف اپوزیشن دے لوکاں نوں جیلاں وچ گھلیا گیا، اوہناں نے 2وار مینوں جیل گھلیا ، عمران نیازی تیجی وار وی جیل گھلن دی تیاری وچ سی، پہلی جیل کٹی تے عمران دے دور وچ عدالت نے ضمانت دتی ۔ وزیر اعظم شہباز شریف نے آکھیا کہ عمران خان دے دوست وکیل نعیم بخاری نے میری ضمانت خارج کرن لئی پٹیشن دائر کیتی سی،جج صاحب دے ریمارکس اُتے نعیم بخاری عدالت توں دم دبا کے نَس گئے سن، عمران نیازی نے نیب گٹھ جوڑ ذریعے مینوںجیل گھلیا ، لہور ہائی کورٹ دے فل بینچ نے دُوجے کیس وچ مینوں ضمانت دتی، میرٹ اُتے رہا ہو کے اج ایوان سامنے موجود ہاں۔