پارلیمنٹ دی بالادستی لئی ڈٹ کے مقابلہ کیتا جائے گا: اتحادی جماعتاں دا فیصلہ

اسلام آباد(پنجابی میڈیاگروپ)وزیر اعظم شہباز شریف دی زیر صدارت اتحادی رہنماواں دا اجلاس ہویا جس وچ مولانا فضل الرحمان، آصف زرداری، مریم نواز سنے ہور اتحادی جماعتاں دے رہنماواں رَلت کیتی جدکہ ویڈیو لنک اُتے نواز شریف وی رَلتی ہوئے۔اجلاس وچ ملکی سیاسی صورتحال تے آئینی بحران اُتے تفصیلی مشاورت کیتی گئی، قنونی ٹیم ولوں سپریم کورٹ دے3 رکنی فیصلے اُتے بریفنگ دیندیاں ہویاں مختلف آئینی تے قنونی آپشناں سیاسی قیادت دے سامنے رکھیاں گئیاں، قنونی ٹیم نے عدالتی حکم نوں ناقابل عمل قرار دے دتا ۔ ذرائع مطابق لیگل ٹیم نے اجلاس نوں دسیا کہ ادھورے فیصلہ اُتے عملدرآمد ممکن نہیں ہوئے گا، ایس موقع اُتے رَلتیاں نے3رکنی بینچ دے فیصلے نوں متنازع قرار دیندیاں ہویاں آکھیا کہ قومی معاملے بارے نامکمل فیصلے اُتے تشویش اے تے وزیراعظم دی قیادت اُتے مکمل اعتماددا اظہار کردے نیں۔اجلاس وچ سیاسی قائدین نے آکھیا کہ سول بالادستی تے پارلیمان دے استحکام لئی ڈٹ کے مقابلہ کیتا جائے گا، پارلیمنٹ دی بے توقیری کسی صورت برداشت نہیں کیتی جائے گی، فل کورٹ نہ بنا کے انصاف دا قتل کیتا گیا، پارلیمنٹ اپنی بالادستی تسلیم کروائے، اجے وی معذرت خواہانہ رویہ اختیار کیتا تے بوہت نقصان ہوئے گا۔ذرائع مطابق پی ڈی ایم سربراہ مولانا فضل الرحمان نے پارلیمان دی بالادستی لئی ٹکرا دی راہ اپنان دی تجویز دے دتی جدکہ نواز شریف تے مریم نواز نے بینچ وچ شامل ججاں خلاف ریفرنس دائر کرن دا اصرار کیتا۔