عمران خان جمہوریت نوں کمزور کر رہے نیں: قمر زمان کائرہ

اسلام آباد(پنجابی میڈیا گروپ)وزیر اعظم دے مشیر برائے امور کشمیر قمر زمان کائرہ نے آکھیا اے کہ عمران خان جمہوریت نوں کمزور کر رہے نیں ۔ قومی اسمبلی دے اجلاس وچ اظہار خیال کردیاں ہویاں قمر زمان کائرہ نے آکھیا کہ ملک وچ پہلی وار اک وزیر اعظم نوں آئینی طریقے نال گھر گھلیا گیا، ملک دے کونے کونے وچ عدالتی فیصلے اُتے عمل دے حوالے نال بحث ہو رہی اے، پنجاب تے کے پی دیاں اسمبلیاں توڑیاں گئیاں ۔ پیپلز پارٹی دے رہنما نے آکھیا کہ اسمبلیاں اُتے بحث دی گل وی ایسی بینچ وچ ہوئی، عدالت نے ایس کرائسز نوں کھڑا کیتا اے، عدالت اج خود قوم نوں تقسیم کر رہی اے، اج 3رکنی بینچ مانیٹرنگ جج بن گئے نیں، عدلیہ حکم دے رہی اے کہ ملک کِنج چلانا اے۔اوہناں نے آکھیا سب دا مطالبہ سی کہ فل کورٹ بنا دتا جائے، آدھے جج نال نہیں بیٹھدیتے اوہ ساہنوں کیہ اخلاقی درس دیون گے، تُسی بھٹو شہید نوں پھانسی دتی، کیا مسئلے حل ہو گئے؟اج سارے کہندے نیں بوہت وڈا گناہ ہو گیا، اج اسیں اینہاں فیصلیاں دی سزا بھگت رہے ہاں۔