جیہڑی سیاسی پارٹی الیکشن توں نَسے گی اوس دی سیاست دفن ہو جائے گی: وزیر اعظم

اسلام آباد(پنجابی میڈیا گروپ)وزیر اعظم شہباز شریف نے آکھیا اے کہ کوئی سیاسی پارٹی الیکشن توں نہیں نَس رہی، جیہڑی پارٹی الیکشن توں نَسے گی اوس دی سیاست دفن ہو جائے گی۔اسلام آباد وچ لائرز کمپلیکس دی افتتاحی تقریب نال خطاب کردیاں ہویاں وزیر اعظم شہباز شریف نے آکھیا کہ لائرز کمپلیکس وچ اگر سپورٹس کمپلیکس نہیں تے اوس نوں شامل کیتا جائے، عورتاں تے مرداں لئی سوئمنگ پول وی ہونا چاہیدا اے، وکیلاں نے قنون دی حکمرانی تے انصاف لئی کوشش کیتی، وکیلاں نوں ایہ مقام کسی نے پلیٹ وچ رَکھ کے نہیں دتا، اوہناں نے عدلیہ بحالی لئی قربانیاں دتیاں نیں۔وزیر اعظم شہباز شریف نے ہور آکھیا اے کہ وکیلاں توں وَدھ آئین و قنون لئی کسی نے جدوجہد نہیں کیتی، وکیلاں نے عدلیہ بحالی لئی گولیاں، ڈنڈے کھادے، ساہنوں تے حکم دتا جاندا اے وزیر اعظم تنہا کجھ نہیں، جنہاں نے ایہ حکم دتا اپنے اُتے فیصلہ کیوں نہیں لاگو کردے، عدالت دا اسیں سارے احترام کردے ہاں،9رکنی بینچ بنیا فیر آخر وچ 3رکنی بینچ رہ گیا، 4، 3 دی اک بحث چل رہی سی۔