چیف جسٹس اک بندے دی ضداُتے ملک نوں نقصان نہ پہنچان:رانا ثنا اللہ

اسلام آباد(پنجابی میڈیا گروپ)وفاقی وزیر داخلہ رانا ثنا اللہ نے آکھیا اے کہ متنازع الیکشن نال ملک وچ افراتفری دا خدشہ اے، چیف جسٹس توں گزارش اے کسی دی ضد اُتے ملک نوں نقصان نہ پہنچان، اک فرد واحد دی انا دی تسکین لئی ملک نوں آمریت دے اندھیریاں وچ نہ دھکیلن ۔ لائرز کمپلیکس دی تقریب نال خطاب کردیاں ہویاں رانا ثنا اللہ نے آکھیا کہ مسلم لیگ (ن)عوام دی خدمت اُتے یقین رکھدی اے، وکلا برادری ساڈے معاشرے دا لازمی حصہ اے، لائرز کمپلیکس اُتے تقریبا 2 ارب روپے لاگت آئے گی، لائرز کمپلیکس نوں 12 مہینیاں دی قلیل مدت وچ مکمل کیتا جائے گا، ملک وچ متنازع الیکشن کران دی کوشش کیتی جا رہی اے۔وزیر داخلہ نے آکھیا کہ مسلم لیگ(ن)نوں عوام وچ جان وچ کوئی خوف نہیں اے، ایہ الیکشن صرف فرد واحد دی انا، ضد، خود پرستی دی تشکیل لئی کرایا جا رہیا اے، ایہ اسمبلیاں ٹٹیاں نہیں اک خاص مقصد لئی توڑیاں گئیاں نیں، پنجاب اپنے تینوں بھراہوں دے نال مل کے جمہوریت دے سفرنوں اگے ودھانا چاہندا اے، پنجاب دے الیکشن عام الیکشن اُتے اثر انداز ہون گے۔ رانا ثنا اللہ نے ہور آکھیا کہ چیف جسٹس صاحب توں گزارش کراں گا الیکشن وچ سکیورٹی پوری نہیں ہوئے گی، حلقیاں وچ ججز ریٹرننگ افسر نہیں ہون گے تے ایہ پورے ملک نوں خون وچ نہلان والی گل اے، ایس ملک نوں 1970 دے الیکشن نے دولخت کیتا، 1977 دے الیکشن نوں آمریت دے اندھیریاں وچ دھکیلا، وکلا برادری ملک نوں ایس مشکل توں بچائے۔