سپریم کورٹ فیصلے دے خلاف قرارداد سوائے ردی دے کجھ نہیں ‘اسد عمر

لہور(پنجابی میڈیاگروپ)پاکستان تحریک انصاف دے سیکرٹری جنرل اسد عمر نے آکھیا اے کہ حکومت نے قومی اسمبلی وچ سپریم کورٹ دے فیصلے خلاف جیہڑی قرارداد منظور کیتی اے اوس دی ردی دی ٹوکری دے علاوہ کوئی جگہ نہیں اے،سپریم کورٹ نے اپنے فیصلے دی تعمیل لئی مانیٹرنگ دی ذمہ داری وی خود لئی اے ، عدالتی فیصلے دی تعمیل ریاست پاکستان نے کرانی اے ، یقینی طوراُتے آئندہ وزیر اعظم عمران خان ہی ہون گے تے سارے ادارے ملک نوں درپیش مشکلاں توں کڈن لئی مل کے کم کراں گے۔ عدالت پیشی دے بعد پارٹی دی مرکزی رہنما مسرت جمشید چیمہ تے ہوراں دے ہمراہ میڈیا نال گل بات کردیاں ہویاں اسد عمر نے آکھیا کہ سب نوں پتہ اے کہ عدالتی نظام کس بنیاد اُتے چلدا اے ، مختلف کیساں لئی مختلف بنچ بنائے جاندے نیں تے بنچ دی اکثریت جیہڑا فیصلہ کردی اے اوہی عدالت دا حکم ہُندا اے ، پورا عدالتی نظام آئین و قنون تحت چلدا اے ۔اوہناں نے آکھیا کہ قومی اسمبلی وچ سپریم کورٹ دے خلاف جیہڑیاں دھواں دھار تقریراں کیتیاں گئیاں اوہ آئین دے منافی نیں ،آئین وچ واضح لکھیا ہویا اے سپریم کورٹ خلاف ایس طرح دا اقدام نہیں ہو سکدا ۔ پارلیمان تے چلدی اے ووٹاں تے اکثریت اُتے لیکن قومی اسمبلی وچ اقلیت نے فیصلہ کیتا اے تے چھوٹی اقلیت نے فیصلہ کیتا اے۔