سپریم کورٹ خلاف قرارداد امپورٹڈ حکومت دے متھے اُتے کالک اے ‘مسرت جمشید چیمہ

لہور( پنجابی میڈیاگروپ)پاکستان تحریک انصاف دی مرکزی رہنما مسرت جمشید چیمہ نے آکھیا اے کہ قومی اسمبلی وچ سپریم کورٹ خلاف منظور کیتی گئی قرارداد رہندی دنیا تک امپورٹڈ حکومت دے متھے اُتے کلنک دا ٹیکہ ثابت ہوئے گی ،372 دے ایوان وچوں صرف 42لوکاں دے دستخطاں نال قرارداد پیش کیتی گئی جیہڑی واضح کردی اے کہ ایہ اپنیاں صفاں وچ وی ہار گئے نیں ، بلاول بھٹو اک ساہ وچ اپنے نانا دی شہادت کیش کراندا اے تے دُوجی ساہ وچ ایہ کہندا اے کہ الیکشن ہوئے تے ملک وچ مارشل لاء لگ جائے گا ، آئین شکنی کرن تے مارشل لاء دا پرچار کرن والے ٹولے دا آئین و قنون مطابق محاسبہ کیتا جائے گا۔ عدالت وچ پیشی اُتے میڈیا نال گل بات کردیاں ہویاں مسرت جمشید چیمہ نے آکھیا کہ تحریک انصاف دے رہنماواں دے خلاف جھوٹے مقدمیاں دے اندراج دا سلسلہ رُکن دا نام نہیں لے رہیا ، علی امین گنڈا پوری دی بغیر کسی مقدمے وچ گرفتاری دی شدید مذمت کردی ہاں