الیکشن نہ کرانا ، لندن پلان اے:عمران خان
لہور(پنجابی میڈیاگروپ)چیئرمین پاکستان تحریک انصاف عمران خان نے آکھیا اے کہ میرے خلاف سازش امریکا نہیں ایدھروں ہی شہباز شریف نوں لیان لئی کیتی گئی، ساری سازش باجوہ نے ایکسٹینشن لئی کیتی، بعد وچ پتا چلیا اوہناں نے حسین حقانی نوں میرے خلاف ہائر کیتا۔ویڈیو لنک ذریعے خطاب کردیاں ہویاں سابق وزیر اعظم عمران خان نے آکھیا اے کہ اج توں 1ورھے پہلاں میں اپنی ڈائری چُک کے وزیر اعظم ہائوس توں نکلیا، مینوں کَڈن پیچھے اک بوہت وڈی سازش سی، میرے خلاف سازش کڈن توں 1 سال پہلاں شروع ہوئی، میں مڈل ایسٹ دے اک سربراہ نوں مل رہیا ساں تے اوس نے مینوں سازش بارے دسیا، اوس نے دسیا کہ تہاڈا آرمی چیف تہاڈے خلاف سازش کر رہیا اے ۔ چیئرمین پی ٹی آئی عمران خان نے آکھیا کہ میں بڑا حیران ہویا کہ اسیں تے اک پیج اُتے ہاں، میں سوچ وی نہیں سکدا ساں کہ اینج کر سکدے نیں، جَد میںجائزہ لئیا تے پھر پتا چلیا کہ کس طرح دی سازش ہوئی، اک کردار جیہڑا ماسٹر مائنڈ سی اوس دی آہستہ آہستہ سمجھ آئی، ایہ میری جگہ شہباز شریف نوں لیانا چاہندے سن، باجوہ دی ڈیل ہو چکی سی، شہباز شریف نوں کیساں وچ سزا ہون والی سی۔عمران خان نے آکھیا کہ اج اسیں وائٹ پیپر جاری کیتا اے، وائٹ پیپر وکھان دا مقصد 1 سال وچ ہونے والی تباہی بیان کرنا اے، اک بند کمرے وچ تھوڑے جہئے لوکاں نے ملک نوں ایس نہج اُتے پہنچایا، 1 ورھے پہلاں پاکستان کیتھے کھڑا سی تے اج کیتھے کھڑا اے، 2018 وچ حکومت سنبھالی تے 20 ارب ڈالردا خسارہ سی، ساہنوں 2ورھے کورونا نال نمٹن وچ لگ گئے، اسیں جِداں کورونا نال نمٹیا دنیا نے اوس نوں تسلیم کیتا۔اوہناں نے آکھیا کہ اسیں ٹیرارزم توں ٹورازم اُتے آگئے ساں لیکن حالات دوبارہ خراب ہو گئے، شکر اے اینہاں نوں حکومت نہیں سی ملی ورنہ اج ملک بالکل تباہ ہو چکیا ہُندا، اینہاں آندیاں ہی پہلاں نیب فیر ایف آئی اے نوں تباہ کیتا، توشہ خانہ کیس اُلٹا اینہاں اُتے پہ جائے گا، اینہاں نے جیہڑیاں گڈیاں چوری کیتیاں اوہ سامنے لے کے آواں گے، ساہنوں میڈیا توں بلیک آٹ کردتا گیا، ایہ کہندے نیں کہ اسیں میڈیا اُتے پابندیاں لائیے۔
