قوم و ملک دے مستقبل لئی فیصلے کرن دا اختیار پارلیمنٹ نوں دتا جائے:آصف زرداری

کراچی(پنجابی میڈیا گروپ)سابق صدر آصف علی زرداری ہوراں آکھیا اے کہ 18ویںآئینی ترمیم ذریعے1973دا آئین اصل صورت وچ بحال ہو چکیا اے، قوم تے ملک دے مستقبل لئی فیصلے کرن دا اختیار پارلیمنٹ نوں دتا جائے۔اپنے اک بیان وچ پیپلز پارٹی پارلیمنٹیرینز دے صدر آصف علی زرداری نے آکھیا اے کہ1973دے آئین دی گولڈن جوبلی اُتے قوم نوں مبارکباد دیندا ہاں، آئین دی حفاظت لئی کسی وی قربانی توں گریز نہیں کراں گے، قائد عوام ذوالفقار علی بھٹو شہید نے1973 دے آئین دی صورت وچ قوم نوں تحفہ دتا سی جیہڑا متفقہ دستور اے، ہیروز نوں سرخ سلام جنہاں نے آئین دی بحالی لئی عظیم قربانیاں دتیاں نیں۔ سابق صدر مملکت آصف علی زرداری نے ہور آکھیا کہ آمریت وچ جیالیاں نے قربانیاں نال جمہوریت لئی جدوجہد کرن والیاں نوں رستہ وکھایا، سارے سیاسی کارکناں نوں خراج عقیدت پیش کردا ہاں جنہاں نے قربانیاں دتیاں، گڑھی خدا بخش بھٹو دا گنج شہیدان جمہوریت پرستاں لئی مینار نور اے،1973دے آئین دی اصل صورت وچ بحالی محترمہ بینظیر بھٹو شہید دی زندگی دا اولین مقصد سی۔