اسٹیبلشمنٹ نے جھوٹے، نااہل عمران خان نوںساڈے اُتے مسلط کیتا:رانا ثنا اللہ

فیصل آباد(پنجابی میڈیا گروپ)وفاقی وزیر داخلہ رانا ثنا اللہ نے آکھیا اے کہ اسٹیبلشمنٹ نے عمران خان ورگے جھوٹے، نااہل انسان نوں ساڈے اُوتے مسلط کیتا۔فیصل آباد وچ تقریب نال خطاب کردیاں ہویاں مسلم لیگ(ن)دے رہنما رانا ثنا اللہ نے آکھیا اے کہ حلقے وچ تعمیر و ترقی دے کم جاری نیں، حلقے وچ ارباں روپے دے منصوبے شروع کیتے، عوام دے ووٹ نال مسلم لیگ ن دوبارہ اقتدار وچ آئے گی، تعمیر و ترقی دا سلسلہ ایسی طرح جاری رکھاں گے۔وفاقی وزیر داخلہ رانا ثنا اللہ نے ہور آکھیا اے کہ عوام دے پیسے اسیں ایمانداری نال لا رہے ہاں، عمران خان نے آئی ایم ایف نال سخت شرطاں اُُتے معاہدہ کیتا، نواز شریف نے لوڈشیڈنگ تے اَت گردی ختم کیتی، عمران خان نے 4 ورھیاں وچ اک وی سڑک نہیں بنائی۔مسلم لیگ (ن) دے رہنما رانا ثنا اللہ نے آکھیا اے کہ عمران خان نے اپنے دوروچ سیاسی مخالفاںاُتے کیچڑ اُچھالیا، اوہناں نے دُوجیاں اُتے الزام لان دے علاوہ کجھ وی نہیں کیتا، اگر عوام نے دوبارہ دھوکا کھدا تے ساہنوں لمبی سزا ملے گی۔