پی ڈی ایم سیاست نوں ذاتی دشمنی وچ بدل کے ملکی سالمیت دا اُتے نہ لائے: پرویز الٰہی

لہور(پنجابی میڈیاگروپ)سابق وزیر اعلی پنجاب چودھری پرویز الٰہی نال سیاسی رہنماواں فاروق امان اللہ دریشک، در محمد دریشک تے علی امان اللہ دریشک نے ملاقات کیتی۔ایس موقع اُتے گل بات کردیاں ہویاں تحریک انصاف دے صدرچودھری پرویز الٰہی نے آکھیا اے کہ عمران خان دے خلاف عدم اعتماد دا فیصلہ چیف جسٹس عمر عطا بندیال نے دتا سی تے PDMوالے احترام دے نال کھڑے ہپندے سن تے نام چُمدے سن، ہُن اوہناں نے آئین مطابق پنجاب وچ الیکشن دا اعلان کیتا تے سب مخالفت اُتے اُتر آئے نیں، شہباز شریف نے چیف جسٹس خلاف بولن لئی ذاتی ملازماں نوں اگے لا رکھیا اے۔ سابق وزیر اعلی پنجاب چودھری پرویز الٰہی نے آکھیا اے کہ جیہڑا اینہاں اُتے احسان کردا اے ایہ اوسی نوں بدنام کرن دی کوشش کردے نیں اینہاں دیاں شکلاں ویکھن والیاں ہُندیاں نیں، پنجاب دے الیکشن دی تریخ دین نال مسلم لیگ (ن) دے پیٹ وچ تکلیف کیوں اٹھ رہی اے، نااہل حکمراناں دیاں غلطیاں داخمیازہ پاکستانی قوم چُکنی پہ رہی اے، سیاسی کردار اپنے فائدے اُتے توجہ مرکوز کیتے ہوئے نیں، ذاتی سیاست لئی قوم نوں قربان کیتا جا رہیا اے۔چودھری پرویز الٰہی نے ہور آکھیا اے کہPDMسیاست نوں ذاتی دشمنی دا رنگ نہ دیوے، ملکی سالمیت نوں دا اُتے نہ لائے، صدر عارف علوی دا بل اُتے دستخط توں انکار ملکی آئین دے مطابق اے آئین توں انکار نہیں، وزیر خزانہ تے وزیر داخلہ دا بیان کہ 90دناں وچ الیکشن نہیں ہو سکدے کھلم کھلا سپریم کورٹ دے فیصلے دی نفی اے۔