کوشش اے دواواں دیس وچ آسانی نال دستیاب ہون: وزیراعظم عمران خان
اسلام آباد: وزیراعظم عمران خان آکھیا اے سرکار دی اولین ترجیح عوام نیں، بھرپور کوشش اے دواواں دیس وچ آسانی نال دستیاب ہون۔ وزیراعظم عمران خان دی زیر صدارت اہم اجلاس ہویا جہدے وچ دواواں دی دستیابی، قیمتاں دے تعین تے ڈریپ دی کارکردگی دا جائزہ لیا گیا۔
زندگی بچان والی دواواں دی دستیابی تے ایہناں دی قیمتاں دے تعین تے تفصیلی بریفنگ دتی گئی۔ ڈریپ کارکردگی، ادارے نوں فعال بنان تے کرپشن توں پاک کرن دی کوششاں تے وی تبادلہ خیال کیتا گیا۔
عمران خان دا کہنا سی دواواں مناسب قیمت تے عوام نوں میسر آن، ایس ضمن وچ ڈریپ دا بطور ریگولیٹر کلیدی کردار اے، پالیسی سازی تے پالیسی تے عملدرآمد دے ضمن وچ موجودہ حکومت دی پالیسی بہت واضح اے، پالیسی سازی تے پالیسی تے عملدرآمد نوں یکجا کرن نال مسئلے جنم لیندے نیں، ڈرگ ریگولیٹری اتھارٹی نوں مکمل طور تے متحرک و فعال بنان لئی کوششاں نوں تیز کیتا جاوے۔
وزیراعظم نے ہور آکھیا انتظامی سطح تے ادارے دی افرادی قوت نوں ترجیحی بنیادا تے پورا کیتا جاوے، پالیسی سازی تے پالیسیاں تے عملدرآمد دے شعبیاں نوں وکھرا کرن لئی ضروری اقدامات کیتے جان۔
