ملک نوں حکومت نہیں ، مزدور چلا رہیا اے:سراج الحق

لہور( پنجابی میڈیاگروپ)امیر جماعت اسلامی سراج الحق دا کہنا اے کہ غریب مزدور پاکستان دی خاطر اپنا خون نچھاور کررہیا اے، ملک نوں حکومت نہیں مزدور چلا رہیا اے۔امیر جماعت اسلامی سراج الحق نے پنجاب اسمبلی سامنے مزدور ریلی نال خطاب کردیاں ہویاں آکھیا کہ اج یکم مئی اُتے پوری دنیا وچ لوگ مزدور ڈے منارہے نیں، اج ایہ جلسہ منعقد کرکے پاکستان دے مزدوراں دی نمائندگی کیتی گئی اے، مزدوراں ولوں پاکستان دی حکومت نال گل بات کرنا چاہندا ہاں، پاکستان تے مزدور چلا رہیا اے تے وی آئی پی لُٹ رہیا اے، مزدوراں دی جدوجہد نوں خراج تحسین پیش کرن آیا ہاں ۔ سراج الحق نے آکھیا کہ مزدوراں دے حقوق لئی جماعت اسلامی کھڑی اے، میں مزدوراں لئی عزت والی چھت ویکھنا چاہندا ہاں، پاکستان وچ8 کروڑ مزدور نیں، مزدوراں دے بالاں دی کفالت دا کوئی انتظام نہیں، پاکستان دے سیاسی لیڈران ،حکومتاں نے مزدوراں نوں دھوکا دتا، روٹی کپڑا مکان دے نام اُتے تبدیلی دے نام اُتے مزدوراں نوں دھوکا دتا گیا، 75سالاں توں ملک دی غریب عوام دا استحصال جاری اے، پسینے مزدور بہاندا اے،مزے کوئی ہورلیندا اے۔امیر جماعت اسلامی نے آکھیا کہ ایتھے کسان دی نمائندگی جاگیردار کردا اے، اپنے کتیاں دا خیال رکھتے نیں مگر ایہ ظالم لوگ غریب دے بالاں دا خیال نہیں رکھدے، امیراں دے کتیاں لئی باہروں خوراک آندی اے، غریب دے بالاں نوں دو ویلے دی روٹی میسر نہیں، اینہاں جاگیر داراں تے سرمایہ داراں نوں غریب دا کوئی احساس نہیں، اللہ نے جیہڑاساہنوں نظام دتا ایس وچ غریب دے حقوق دی عزت اے، میں اوس نظام دی بات کردا ہاں جس وچ اک خلیفہ وی اک مزدور ونگوں تنخواہ لینداسی۔