نوازشریف دی سیاست ختم کرن والی جماعت کرچی کرچی ہو گئی:مریم نواز

باغ(پنجابی میڈیا گروپ)مسلم لیگ ن دی چیف آرگنائزروسینئر نائب صدر مریم نواز نے آکھیا اے کہ نوازشریف دی سیاست ختم کرن والی جماعت کرچی کرچی ہو گئی،بنکر وچ چھپ کے بیٹھن والے نوں عوام نشان عبرت بنا دیوے گی ۔ باغ آزاد کشمیر وچ جلسہ نال خطاب کردیاں ہویاں مریم نواز نے آکھیا کہ خالص کشمیری ہاں کوئی سیاسی نعرہ نہیں، اج اسیںکشمیر دی وادی وچ کھڑے ہاں، کشمیر دے ہر گھر وچ شہید موجود نیں ۔ مریم نواز نے کشمیر دے شہیداں نوں خراج عقیدت پیش کردیاں ہویاں آکھیا کہ کشمیر دے شہیداں نوں سب دا سلام، وطن لئی جاناں قربان کرن والیاں نوں سلام، شہیداں دیاں یادگاراں نوں ساڑن والیاں دااحترام نہیں کراں گے،شہیداں دی بے حرمتی کرن والا ساڈے وچوں نہیں ہو سکدا، شہیداں دے مجسمیاں نوں توڑن والا پاکستانی نہیں ہو سکدا۔اوہناں نے آکھیا کہ کوئی کنا وی غصے وچ ہوئے کوئی پاکستانی ملک نوں اگ لان دی جرات نہیں کر سکدا،9 مئی نوں جو کجھ ہویا پورا آزاد کشمیر شرمندہ اے، شہیداں دے نال ایسا سلوک کرن والے نوں قوم معاف نہیں کرے گی، اوہ چھپ کے بنکروچ بیٹھیا اے، عوام اوس نوں نشان عبرت بنا دیوے گی۔ نائب صدر ن لیگ نے آکھیا کہ ایہ شخص ٹرمپ دے گھٹنیاں وچ بیٹھ کے کشمیر داسودا وی کر کے آیا سی، قوم اوس نوں معاف نہیں کرے گی۔اوہناںنے آکھیا کہ جَد موٹر وے اُتے سفرکردے او تے کس دا نام یاد آندا اے؟ آزاد کشمیروچ ہسپتال، سکول، یونیورسٹیاں ویکھدے او تے کس دا نام یاد آندا اے، 75 ورھیاں وچ نوازشریف دے9ورھے کڈ دیو تے کجھ نظرنہیں آندا، گھیرا جلا، فتنہ بازی دی سیاست توں کون یاد آندا اے، جَد کسی دے کول کارکردگی نہ ہوئے اینج دیاں حرکتاں کیتیاں جاندیاں نیں، جس نوں مسلط کیتا گیا اج اوہ جماعت کیتھے گئی؟ جیتھوں جماعت آئی اوتھے واپس چلی گئی۔مریم نواز نے آکھیا کہ آزاد کشمیردا سابق وزیراعظم اوس دے خلاف گواہی دے رہیااے، نوازشریف دی سیاست ختم کرن والی جماعت کرچی کرچی ہو گئی، نوازشریف دے کئی دشمن آئے تے گئے، مشرف دور توں ایہی کجھ ویکھ رہے ہاں، اللہ تعالی نواز شریف نوں بار بار لے کے آندااے۔