پنجاب حکومت دا ریسٹورنٹس کھولن دی اجازت دین دا فیصلہ

لہور: وزیراعلیٰ پنجاب دی ہدایت تے کورونا کابینہ کمیٹی اجلاس وچ ریسٹورنٹس کھولن دی اجازت دین دا فیصلہ کر لیا گیا اے۔

ذرائع دے مطابق پنجاب حکومت نے وفاقی حکومت نوں ریسٹورنٹس کھولن دی سفارش کیتی اے۔ قومی رابطہ کمیٹی اجلاس وچ سفارش حتمی منظوری لئی پیش کیتی جاوے گی۔

اجلاس وچ فیصلہ کیتا گیا کہ صوبہ پنجاب وچ مارکیٹاں تے شاپنگ مالز دے اوقات کار صبح 9توں 5 وجے ہون گے۔ پنجاب وچ مارکیٹاں، بازار تے شاپنگ مالز نوں ہفتہ وچ چار دن کم دی اجازت ہوویگی۔

جمعہ، ہفتہ تے اتوار نوں مارکیٹاں، شاپنگ مالز تے بازار بند رہن گے۔اجلاس وچ مری تے گلیات وچ ہوٹلز نوں اجازت دین لئی وفاق توں رجوع کرن دا فیصلہ کیتا گیا۔ تفریحی مقامات نوں سیاحیاں لئی کھولن دی وفاقی حکومت توں سفارش کیتی جاوے گی۔وزیر قانون راجہ بشارت، سینئر وزیر عبدالعلیم خان تے وزیر تجارت میاں اسلم اقبال نے اجلاس وچ شرکت کیتی۔

محکمہ صحت دے حکام نے اجلاس نوں کورونا بارے بریفنگ جدکہ انتظامی اداریاں نے ایس او پیز تے عملدرا?مد دی رپورٹ پیش کیتی۔