ہر پاکستانی شہری دی جان و مال سب توں مقدم اے، ریاست دی رٹ قائم کرن لئی کسی وی حد تک جاواںگے،آرمی چیف

نہ سمجھو گے تو مٹ جاو گے اے ہندوستان والو، تمہاری داستاں تک بھی نہ ہوگی داستانوں میں سربراہ پاک فوج نے شعر وی پڑھیا
اسلام آباد(بیوروروپورٹ)آرمی چیف جنرل سید عاصم منیر نے اک وار فیر واضح کیتا اے کہ ریاست دی رٹ قائم کرن لئی کسی وی حد تک جاواں گے، ہر اک پاکستانی شہری دی جان و مال سب توں مقدم اے۔میڈیا رپورٹ مطابق ایپکس کمیٹی دے اجلاس دے حوالے نال آرمی چیف جنرل سید عاصم منیر نے آکھیا کہ اپیکس کمیٹی دااجلاس ہر اعتبار نال تریخی سی ، اجلاس وچ سارے وفاقی تے صوبائی قنون نافذ کرن والے اداریاں دے سربراہ اک چھت تھلے موجود سن۔اونہاں نے آکھیا کہ غالبا ایہ پہلی دفعہ سی کہ ملک دے سارے قنون نافذ کرن والے چھوٹے تے وڈھے ادارے ایس میٹنگ دا حصہ سن، اجلاس سے دوران بڑی کلیریٹی تے غیر مبہم انداز وچ گل بات کیتی گئی ۔ جنرل سید عاصم منیر نے آکھیا کہ اک پاکستانی شہری دی جان و مال تے فلاح و بہبود کسی وی دوجے ملک تے کسی وی دنیاوی مفاد نال مقدم اے۔ آرمی چیف نے آکھیاکہ پاکستان دے کول صرف اک ہی آپشن اے، ساہنوں اینہاں چیلنجاں سامنے کھڑے ہونا اے،اسیں ریاست دی عمل داری قائم کرن لئی انتہائی اقدام تک جاواں گے۔ایپکس کمیٹی دے اجلاس دے آخر وچ آرمی چیف نے اقبال دا ایہ شعر وی پڑھیا کہ نہ سمجھو گے تو مٹ جاو گے اے ہندوستان والو، تمہاری داستاں تک بھی نہ ہوگی داستانوں میں۔